Azyq-túlik óndirisi 14,7%-ǵa ósip, 2,1 trln teńgege jetti - AShM
ASTANA. KAZINFORM – Aýyl sharýashylyǵy mınıstri Aıdarbek Saparovtyń tóraǵalyǵymen arnaıy keńes ótip, onda 2026 jylǵy qańtar–shilde aılary boıynsha agroónerkásip kesheniniń ekonomıkalyq ósimin qamtamasyz etý máseleleri qaraldy, dep habarlaıdy mınıstrliktiń baspasóz qyzmeti.
Aýyl sharýashylyǵy vıtse-mınıstri Azat Sultanovtyń málimetinshe, bıylǵy jyldyń alǵashqy jartyjyldyǵynda aýyl sharýashylyǵynyń jalpy ónim kólemi 4,4%-ǵa artyp, 2,2 trln teńgeni qurady. Ósim elimizdiń barlyq óńirinde baıqaldy.
-Bıylǵy jyldyń jeti aıynyń qorytyndysy boıynsha aýyl sharýashylyǵy óniminiń naqty kólem ındeksi ósim kórsetýi tıis. Bul úshin memleket tarapynan barlyq qajetti jaǵdaı jasalǵan. Endigi mindet – ár óńirdiń qolda bar múmkindigin tolyq paıdalanyp, jumysty joǵary deńgeıde uıymdastyrý, – dedi Aıdarbek Saparov.
Otyrys barysynda aýyl sharýashylyǵy ónimderin qaıta óńdeý salasyn damytý máselesine erekshe nazar aýdaryldy. Alty aıdyń ishinde azyq-túlik óndirisiniń kólemi 14,7%-ǵa ósip, 2,1 trln teńgege jetti. Al sýsyn óndirisi 4,4%-ǵa artyp, 595 mlrd teńgeni qurady.
Sonymen qatar birqatar óńirde azyq-túlik óndirisiniń naqty kólem ındeksi boıynsha josparlanǵan kórsetkishterdiń oryndalmaǵany da aıtyldy. Oblys ákimdikteriniń ókilderi qalyptasqan jaǵdaıdyń sebepterin baıandap, kórsetkishterdi jaqsartý baǵytynda qabyldanatyn sharalar týraly aqparat berdi.
Atqarylǵan jumstardy qorytyndylaı kele, Aıdarbek Saparov óńir ákimdikterine qaıta óńdeý kásiporyndarynyń qyzmetine aı saıyn monıtorıng jasaýdy kúsheıtýdi, ýaqytsha toqtap turǵan kásiporyndardyń jumysyn qaıta jandandyrý jóninde naqty sharalar qabyldaýdy, kásiporyndardy aınalym qarajatymen ýaqtyly qamtamasyz etý máselelerin sheshýdi jáne 2026 jylǵy qańtar–shilde aılarynyń qorytyndysy boıynsha belgilengen nysanaly kórsetkishterdiń oryndalýyn qamtamasyz etýdi tapsyrdy.
-Qajet bolǵan jaǵdaıda árbir problemaly kásiporynmen jeke jumys júrgizińizder. Týyndaǵan máselelerdi sozbalańǵa salmaı, jedel sheshińizder. Eń bastysy – ósim qarqynynyń tómendeýine jol bermeý. Qoıylǵan mindetterdi oryndaýǵa barlyq jaǵdaı jasalǵan, – dedi mınıstr.
Keńeske qarjy ınstıtýttarynyń, Aýyl sharýashylyǵy mınıstrliginiń qurylymdyq bólimsheleriniń basshylary jáne oblys ákimderiniń orynbasarlary qatysty.
Osyǵan deıin shildedegi úsh aptanyń qorytyndysy boıynsha jyl basynan beri alǵash ret áleýmettik mańyzy bar azyq-túlik baǵasynyń ortasha ındeksiniń -0,1%-ǵa tómendeýi tirkelgeni týraly jazdyq.
