Azyq-túlik nelikten qymbattap jatyr – Serik Jumanǵarın paıymy

ASTANA. KAZINFORM — Elimizdegi azyq-túlik baǵasynyń qymbattaýyn qosylǵan qun salyǵynyń artýymen ǵana baılanystyrýǵa bolmaıdy. Bul týraly Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.

Onyń aıtýynsha, azyq-túlik baǵasynyń qalyptasýyna birneshe faktor áser etedi.

– Azyq-túliktiń qymbattaýyn tek QQS-pen baılanystyrýǵa bolmaıdy. Munda kóptegen erekshelik bar. Ózderińiz bilesizder, biz barlyq azyq-túlik túrimen ózimizdi tolyq qamtamasyz ete almaımyz. Áleýmettik mańyzy bar azyq-túlik taýarlary boıynsha ózimizdi 70–90 paıyz aralyǵynda qamtamasyz etemiz. Tek áleýmettik mańyzy bar ónimderdi ǵana emes, basqa da taýarlardy tutynatyn adamdar olardyń ımporttyq bolýy múmkin ekenin túsinýi kerek. Búkil álemde azyq-túlik baǵasy ósip jatyr, – dedi mınıstr Májilistiń jalpy otyrysynan keıin.

Vıtse-premerdiń málimetinshe, ótken jyly kúnbaǵys maıynyń FAO ındeksi 124-ti qurap, sút pen et baǵasy aıtarlyqtaı ósken.

– Bul neni bildiredi? Eksporttyq baǵyttarda ónimderimizge suranys artyp otyr degen sóz. Soǵan oraı fermerlerimiz ónimin eksportqa shyǵarǵysy keledi. Óıtkeni ol jaqta baǵa joǵary. Al biz olarǵa: «Eksportqa satpańyzdar, ishki naryqqa satyńyzdar», – deımiz. Olar: «Marjınaldylyqty arttyrǵymyz keledi», – dep, ishki naryqtaǵy baǵany kóteredi, – dedi Serik Jumanǵarın.

Onyń málimetinshe, qańtar aıynyń qorytyndysynda elimizde azyq-túlik ınflıatsııasy 0,8 paıyz bolsa, Reseıde 2 paıyzǵa deıin jedeldegen.

– Azyq-túliktiń basym bóligin Reseıden alamyz. Soǵan oraı ımport ınflıatsııaǵa áserin tıgizedi. Sondyqtan qosylǵan qun salyǵynyń 4 paıyzǵa ósýin bárine kináli deý durys emes, – dedi vıtse-premer.

Aıta keteıik, Qazaqstan EAEO elderi arasynda azyq-túlik baǵalary boıynsha tómen kórsetkishti saqtap otyr.