Azyq-túlik korporatsııasy ishki naryqty bıdaımen turaqty qamtyp otyr
ASTANA. KAZINFORM – Qazaqstanda bıdaıǵa qatysty ishki naryqtaǵy jaǵdaı turaqty kúıinde qalyp otyr. Qolda bar astyq kólemi un tartý, mal jáne qus sharýashylyǵy syndy negizgi salalardyń qajettiligin tolyq qamtamasyz etýge jetkilikti. Bul týraly AShM janyndaǵy Azyq-túlik kelisimshart korporatsııasy habarlady.
Mekeme qazirgi tańda túrli klastaǵy bıdaıdy satýdy jalǵastyryp otyr jáne múddeli satyp alýshylarǵa astyqty naryqtyq baǵamen usynýǵa daıyn.
2025 jylǵy 19 maýsymdaǵy jaǵdaı boıynsha:
-
3-klass bıdaıdyń ortasha baǵasy (QQS-pen) — tonnasyna 100 000 teńge
-
4-klass bıdaı — tonnasyna 95 000 teńge
2024 jyldyń kúzinde mol ónim men usynystyń artýyna baılanysty baǵa tómendegen bolatyn. Alaıda 2025 jyldyń kókteminen bastap, óńdeý kásiporyndary men treıderler tarapynan suranys artyp, baǵa birtindep óse bastady. Degenmen, baǵanyń kóterilýi satyp alý belsendiligine eleýli áser etken joq.
Jyl basynan beri ulttyq operator 483,6 myń tonna astyq ótkizdi. Onyń negizgi tutynýshylary — un tartý kásiporyndary, qaıta óńdeý zaýyttary, mal jáne qus sharýashylyqtary.
Búgingi kúni korporatsııanyń qorynda 1,1 mıllıon tonna astyq bar. Onyń ishinde:
-
500 myń tonna — azyq-túlik qoryna
-
200 myń tonna — mal azyǵyna arnalǵan.
QR Ulttyq ekonomıka mınıstrliginiń Statıstıka bıýrosynyń málimetinshe, elimizdegi bıdaı qory — 7,37 mln tonna. Bul kórsetkish jyldyq ishki qajettilik (shamamen 6 mln tonna) kóleminen asyp túsedi.
«Azyq-túlik kelisimshart korporatsııasy» 2024 jyldyń sáýirinen bastap bıdaıdy taýarlyq bırja arqyly satýǵa kóshti. Mundaı tásil satyp alýshylardyń korporatsııa resýrstaryna ashyq ári ádil qol jetkizýin qamtamasyz etedi.
Kompanııa barlyq naryq qatysýshylaryn resmı saýda alańy arqyly astyq satyp alýǵa shaqyrady.
Eske sala keteıik, buǵan deıin AShM astyq qory ishki qajettilikti tolyq qamtamasyz etip, eksportty ulǵaıtýǵa múmkindik bergenin málimdegen edi.