Azyq-túlik korporatsııasy bıyl agrarshylardy qoldaýǵa 65,7 mlrd teńge bóledi

AShM málimetinshe, 2026 jyldyń alǵashqy jartyjyldyǵynda fermerlik sharýashylyqtardyń shottaryna 51,6 mlrd teńge aýdarylǵan. Forvardtyq kelisimsharttar tolyq oryndalyp, jetkizilgen ónim úshin túpkilikti esep aıyrysý júrgizilgennen keıin qarjylandyrý kólemi 65,7 mlrd teńgege deıin ulǵaıady.

Qarjylandyrýdyń basym bóligi ulttyq operatordyń menshikti aınalym qarajaty esebinen júzege asyrylady. Sońǵy eki jylda memleket bólgen qarajat búginde qaıta aınalym qaǵıdaty boıynsha agrarshylardy qarjylandyrýǵa qaıta paıdalanylyp jatyr.

– Buǵan deıin «Azyq-túlik kelisimshart korporatsııasynyń» kapıtalyn qalyptastyrýǵa baǵyttalǵan memlekettik ınvestıtsııalar búginde óz tıimdiligin kórsetýde. Kelisimsharttar oryndalyp, aýyl sharýashylyǵy ónimderi ótkizilgennen keıin qarajat qaıta aınalymǵa túsip, agrarshylardy qarjylandyrýǵa qaıta baǵyttalady. Mundaı tetik bıýdjetke qosymsha salmaq túsirmeı-aq aýyl sharýashylyǵy taýaryn óndirýshilerdi jyl saıyn qoldaýǵa jáne qarjylandyrý kólemin kezeń-kezeńimen ulǵaıtýǵa múmkindik beredi, – dedi «Azyq-túlik kelisimshart korporatsııasy» AQ basqarma tóraǵasy Asylhan Djývashev.

Kompanııanyń málimetinshe, qaıta aınalymǵa túsken qarajattyń negizgi bóligi aýyl sharýashylyǵy ónimderin tikeleı satyp alý jáne kóktemgi egis jumystaryn forvardtyq qarjylandyrý baǵdarlamalaryna baǵyttalady.

Tikeleı satyp alý baǵdarlamasy aıasynda fermerler ulttyq operatorǵa 191,8 myń tonna dándi jáne maıly daqyl ótkizdi. Bul ótken jylǵy 92,9 myń tonna kórsetkishten eki ese kóp. Baǵdarlamaǵa qatysqan 257 aýyl sharýashylyǵy óndirýshisine 20,3 mlrd teńge tólendi.

Forvardtyq qarjylandyrý baǵdarlamasyna 172 aýyl sharýashylyǵy qurylymy qatysyp, 471 myń tonna dándi jáne maıly daqyl jetkizýge kelisimshart jasasty.

– Bıyl kóktemgi egis jumystaryn avanstyq qarjylandyrýǵa 31,3 mlrd teńge baǵyttalady. Egin tapsyrylǵannan keıin júrgiziletin qosymsha tólemderdi eskergende, baǵdarlamanyń jalpy kólemi 40 mlrd teńgeden asady, – delingen habarlamada.

Bıyl forvardtyq baǵdarlama aıasynda joǵary tabysty maıly daqyldardy óndirý kólemi de aıtarlyqtaı ósken. Eger 2025 jyly kúnbaǵys, maıly zyǵyr jáne raps boıynsha 36 myń tonna ónimge kelisimshart jasalsa, bıyl bul kórsetkish 94,9 myń tonnaǵa jetken.

Kompanııanyń málimetinshe, tikeleı satyp alý men forvardtyq qarjylandyrý tetikteri fermerlerdi qoljetimdi qarjymen qamtamasyz etip qana qoımaı, memlekettik astyq qoryn tolyqtyrýǵa, jemdik qor qalyptastyrýǵa jáne qaıta óńdeý kásiporyndarynyń turaqty jumysyn qamtamasyz etýge múmkindik beredi.

Aıta keteıik, Astanada ótetin aýyl sharýashylyǵy jármeńkesinde ónimder tıimdi baǵamen satylady.