«Azyq-túlik korporatsııasy» basshylary ustaldy
Sybaılas jemqorlyqqa qarsy qyzmet eldiń azyq-túlik qaýipsizdigin qamtamasyz etý, strategııalyq shıkizat-astyqty jymqyrýǵa jol bermeý maqsatynda «Azyq-túlik kelisimsharttyq korporatsııasy» UK» AQ qyzmetinde jemqorlyq quqyq buzýshylyqtardy anyqtaý boıynsha jumys júrgizip jatyr. Nátıjesinde jemqorlyq qylmysy boıynsha «Azyq-túlik korporatsııasy» óńirlik fılıaldary men vedomstvolyq baǵynysty uıymdarynyń birqatar basshysy ustaldy, dep habarlaıdy QazAqparat vedomstvonyń baspasóz qyzmetine silteme jasap.
Astyq urlaý faktilerin jasyrý úshin para berý kezinde astyq bazalarynyń burynǵy dırektory men onyń kómekshileri qolǵa tústi. Sonymen qatar jasalǵan qylmysty jasyrý kezinde astyq bazalarynyń burynǵy dırektory men onyń seriktesteri ustalyp, para berýge áreket jasaǵandar áshkerelendi.
Qazir kúdiktiler sot sanktsııasymen qamaýǵa alyndy. Sotqa deıingi tergeý júrgizilip jatyr. Sonymen qatar Astana qalasynda qarjy departamentiniń dırektory men «Azyq-túlik korporatsııasy» AQ bas menedjerine qatysty tergeý aıaqtaldy. Tergeý barysynda olar bıdaı túrinde taýarlyq nesıe bergeni úshin kommertsııalyq uıym basshysynan 800 myń teńge somasynda para alǵany anyqtaldy. Aıyptalýshylar sotqa tartyldy.
Arnaıy jedel-izdestirý is-sharalary kesheniniń nátıjesi boıynsha «Azyq-túlik korporatsııasy» AQ Qostanaı oblystyq ókildigi dırektorynyń áreketi áshkerelendi.
Ol JShS ókilinen 100 myń tonna bıdaı kóleminde taýarlyq nesıe alý máselesin kedergisiz sheshkeni úshin 350 myń teńge somasynda para aldy degen kúdikke ilindi. Qazir sotqa deıingi tergeý júrgizilip jatyr.
«Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy. Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi», – delingen habarlamada.
