Azyq-túlik qory: Elorda ákimdigi kásipkerlermen 25 myń tonna ónimmen qamtýǵa kelisti
ASTANA. KAZINFORM – Elimizde kúz basynda azyq-túlik qory jasaqtalyp, baǵany turaqtandyrý, tapshylyqqa jol bermeý máselesi kóteriledi. Osy oraıda Astanada azyq-túlik qory men baǵany turaqtandyrý baǵytynda qandaı jumystardyń atqarylyp jatqanyn Investıtsııalar jáne kásipkerlikti damytý basqarmasynan suraǵan edik.
Basqarma usynǵan málimetke súıensek, qalada áleýmettik mańyzy bar azyq-túlik baǵasyn turaqtandyrýdyń eki tetigi bar:
1) turaqtandyrý qoryn qalyptastyrý;
2) kásipkerlik sýbektilerine nesıe berý.
«Ákimdik «aınalym tetigi» mehanızmi boıynsha jumys isteıdi, ıaǵnı kásipkerlik sýbektilerine jeńildikpen nesıe berý. Nesıe berý – ýaqtyly qaıtarý, ónimdermen merziminde qamtamasyz etý aqyly sharttar negizinde júzege asyrylady. Búginde áleýmettik mańyzy bar azyq-túliktiń 25 myń tonnadan astam ónimder boıynsha kelisim shart jasaldy. Azyq – túlik ónimderi elordanyń saýda obektilerinde bekitilgen baǵada satylyp jatyr», - delingen agenttik joldaǵan saýal jaýabynda.
Elorda ákiminiń ókimimen azyq-túlik baǵasyn belgileý boıynsha óńirlik komıssııa qurylǵan.
«Osyǵan deıin komıssııanyń 77 otyrysy ótkizildi. Basqarma saýda departamentimen birlesip saýda ústemesiniń saqtalýyna turaqty negizde monıtorıng júrgizip keledi. Onyń barysynda 306 deldaldyq jáne saýda ústemesinen asyp ketý faktileri anyqtaldy. Nátıjesinde jalpy somasy 4 144 270 myń teńgege aıyppul salyndy, qalǵan 280 fakti boıynsha eskertý jasaldy», - deıdi basqarmadan.
Aıta ketsek, azyq-túlik qory kásipkerlerdiń nemese jaldamaly qoımalarda saqtalady.
«Baǵany negizsiz ósirmeý, saýda ústemesin asyrmaý, óndirýshiden saýda núktesine deıingi baǵa tizbegin qaraý úshin aptasyna 2 ret baǵa belgileýdiń búkil tizbegi boıynsha deldaldyq tizbelerdi tergeý jónindegi óńirlik komıssııa otyrysy ótkiziledi. Onyń quramynda Ulttyq statıstıka bıýrosynyń departamenti, Ekonomıkalyq tergeý departamenti, Saýda jáne tutynýshylardyń quqyqtaryn qorǵaý departamenti, Memlekettik kirister departamenti, respýblıkalyq kásipkerler palatasy, Tehnıkalyq retteý jáne ádisteme komıtetiniń departamenti jáne Básekelestikti qorǵaý jáne damytý agenttiginiń departamenti ókilderi bar. Bekitilgen kestege sáıkes komıssııa saýda obektilerine aptasyna eki ret monıtorıng júrgizedi. Bólshek saýda obektilerine júrgizilgen monıtorıng barysynda taýar ústemesiniń saqtalmaýy anyqtalǵan jaǵdaıda, kásipkerlik sýbektilerine túsindirý jumystary ótedi», - dep tolyqtyrǵan aqparatta.
Eske sala ketsek, elordada aýyl sharýashylyq ónimderi jármeńkesi 21 qyrkúıekte (senbi, jeksenbi kúnderi) bastaldy, ol qazannyń sońyna deıin jalǵasady. Jármeńkege Aqtóbe, Atyraý, Jambyl, Qyzylorda, Abaı, Almaty, Qostanaı, Túrkistan, Pavlodar, Batys Qazaqstan,Jetisý, Shyǵys Qazaqstan, Soltústik Qazaqstan, Qaraǵandy,Ulytaý jáne Aqmola oblysynyń taýar óndirýshileri qatysady.
