Azyq-túlik kelisimshart korporatsııasy dándi jáne maıly daqyldardy qabyldap jatyr

ASTANA. KAZINFORM – Salyq zańnamasyndaǵy ózgerister men agroónimge ishki baǵalardyń qubylmalylyǵy jaǵdaıynda memlekettik qoldaý sharalarynyń mańyzy artyp otyr. Osyǵan baılanysty Azyq-túlik kelisimshart korporatsııasy 2024-2025 jyldary bastalǵan tikeleı satyp alý baǵdarlamasy aıasynda astyq jáne maıly daqyldardy qabyldaýdy jalǵastyrýda.

Baǵdarlama sheńberinde berilgen ótinimder basym tártippen qaralady. Ónim jetkizýshiler jedel resimdeýge jáne jedel qarjylandyrý alýǵa úmittene alady. Bul fermerlerge kóktemgi egis naýqanyna ýaqytyly daıyndalýǵa múmkindik beredi.

2026 jyly satyp alynatyn daqyldardyń tizbesi keńeıtildi. Bıdaı men arpadan bólek, ulttyq operator kúnbaǵys, maıly zyǵyr jáne qaraqumyq qabyldaıdy. Daqyldar jelisin keńeıtý agroqurylymdardyń kóbirek sanyn qamtyp, egis alqaptaryn ártaraptandyrýdy yntalandyrýǵa baǵyttalǵan.

2026 jylǵy 16 aqpandaǵy jaǵdaı boıynsha aýyl sharýashylyǵy taýaryn óndirýshiler korporatsııa resýrstaryna 114 myń tonna astyq jóneltti. Eń iri kólem Aqmola oblysy sharýashylyqtarynan – 43,7 myń tonna, Soltústik Qazaqstan oblysy – 40 myń tonna jáne Qostanaı oblysy – 24,2 myń tonna kóleminde satyp alynǵan.

Ulttyq operatordyń jáne onyń úlestes qurylymdarynyń qarjylandyrý quraldary boıynsha qoldanystaǵy nemese uzartylǵan mindettemeleri joq fermerler men agroqurylymdarǵa baǵdarlamaǵa qatysýǵa ruqsat etiledi.

Tikeleı satyp alý baǵdarlamasy memlekettik astyq rezervin tolyqtyrý jáne jem-shóp qoryn qalyptastyrý maqsatynda iske asyrylýda. Korporatsııa basqarýynda jyl saıyn shamamen 2 mln tonna memlekettik jáne kommertsııalyq astyq bolady. Onyń ishinde 500 myń tonnasy – memlekettik rezerv, 200 myń tonnasy – jemdik qor. Bul qorlar maýsymdyq jáne baǵa aýytqýlaryn retteýge, ishki naryqtaǵy tapshylyqtyń aldyn alýǵa jáne áleýmettik mańyzy bar azyq-túlik taýarlaryn óndirýge qajetti shıkizattyń turaqty jetkizilýin qamtamasyz etýge múmkindik beredi.

Tikeleı satyp alý tetigi aýyl sharýashylyǵy ónimderin ádil baǵamen kepildi ótkizýge jaǵdaı jasap, «óndirýshi – satyp alýshy» tizbegindegi deldaldardy qysqartady. Sonyń nátıjesinde fermerler rentabeldilikti saqtap, aldaǵy damý josparlaryn aıqyndaı alady, al memleket azyq-túlik naryǵynyń turaqtylyǵyn qamtamasyz etedi.

Baǵdarlamaǵa qatysýǵa ótinimderdi Azyq-túlik kelisimshart korporatsııasynyń óńirlik ókildikteri qabyldaıdy.

Baılanys aqparaty:

• Astana qalasy, Máskeý kóshesi, 29/3, tel. [phone] (ishki 2484; 2025;), 59-12-39 (ishki 2375), 59-12-61 (ishki 2261), 55-11-60 (ishki 2476);
• Aqmola oblysy: Kókshetaý q., Nursultan Nazarbaev kósh., 19, tel. [phone], 55-11-54, 42-25-22;
• Shyǵys Qazaqstan oblysy: Óskemen q., Beıbitshilik kósh., 30, 206 keńse, tel. [phone], 56-06-57;
• Qostanaı oblysy: Qostanaı q., Táýelsizdik kósh., 147, tel. [phone], 53-12-44, 54-28-20;
• Soltústik Qazaqstan oblysy: Petropavl q., Partızanskaıa kósh., 160, tel. [phone], 42-22-66.

Aıta keteıik, buǵan deıin AShM maıly daqyldardyń ósimdik sharýashylyǵynyń tabys draıverine aınalǵanyn habarlady.