Azyq-túlik kelisimshart korporatsııasy 62,7 mlrd teńgelik oblıgatsııasyn ótep, boryshyn qysqartty
ASTANA. KAZINFORM — «Azyq-túlik kelisimshart korporatsııasy» UK» aktsıonerlik qoǵamy jalpy somasy 62,7 mlrd teńgelik orta merzimdi oblıgatsııalardyń eki shyǵarylymy boıynsha óz mindettemelerin tolyq oryndady. Investorlarǵa tıesili tólemder osy jyldyń tamyz aıynyń sońynda tolyq kólemde júrgizildi. Bul týraly AShM málim etti.
Onyń ishinde ınvestorlarǵa 60 mlrd teńge negizgi borysh qaıtarylyp, 2,7 mlrd teńge kóleminde kýpondyq syıaqy tólendi.
Atalǵan oblıgatsııalar ótken jyldyń basynda Qazaqstan qor bırjasynda (KASE) ornalastyrylǵan bolatyn. Oblıgatsııalardyń aınalys merzimin 1,5 jyl dep belgileý kezinde Korporatsııa tıimdi qarjylyq josparlaý qaǵıdattaryn jáne astyq naryǵyndaǵy aqsha aınalymynyń erekshelikterin eskerdi.
— Qarjylandyrý merzimin aıqyndaý kezinde astyq naryǵyndaǵy aqsha aınalymynyń erekshelikterin eskerdik. Egindi satyp alý kezeńinde ótimdilikke degen qajettilik aıtarlyqtaı artady, al ónimdi ótkizýden túsetin qarajat keıingi kezeńderde túsedi. Oblıgatsııalardyń 1,5 jyldyq aınalys merzimi kompanııanyń qarjylandyrýǵa degen qajettiligin kútiletin aqsha túsimderimen úılestirýge jáne ınvestorlar aldyndaǵy mindettemelerdi ýaqytyly oryndaýǵa múmkindik berdi, — dedi «Azyq-túlik kelisimshart korporatsııasy» UK» aktsıonerlik qoǵamy Basqarma tóraǵasynyń birinshi orynbasary Ildar Ismagýlov.
Onyń aıtýynsha, qarjy resýrstaryn tıimdi basqarý Korporatsııa úshin erekshe mańyzdy. Sebebi kompanııa astyq naryǵyndaǵy turaqtylyqty qamtamasyz etýge jáne otandyq aýyl sharýashylyǵy taýar óndirýshilerin qoldaýǵa eleýli úles qosady.
— Biz úshin kompanııanyń qarjylyq turaqtylyǵyn azyq-túlik qaýipsizdigin qamtamasyz etý jáne agroóndirýshilerdi qoldaý sııaqty basym mindetterimizben ushtastyrý asa mańyzdy. Korporatsııa aýyl sharýashylyǵy ónimderin satyp alyp, aýyl sharýashylyǵy taýar óndirýshilerine qarjylandyrýǵa qoljetimdilik beredi. Onyń ishinde forvardtyq jáne tikeleı satyp alý baǵdarlamalary arqyly qoldaý kórsetiledi. Sondyqtan ótimdilikti jáne boryshtyq júktemeni tıimdi basqarý agrarlyq sektordy qoldaýǵa qajetti resýrstardy saqtap, jumysty turaqty jalǵastyrý múmkindigimizmen tikeleı baılanysty, — dep atap ótti Ildar Ismagýlov.
Oblıgatsııalardyń ótelýine baılanysty Korporatsııanyń 2026 jyldyń basynan bergi jalpy boryshtyq mindettemeleri 52,4 mlrd teńgege deıin tómendedi.
— Biz mindettemelerimizdiń edáýir bóligin negizgi qyzmetten túsken qarajat esebinen ýaqtyly ótedik. Sonymen qatar kompanııa agroóndirýshilermen jumysty jalǵastyrýǵa qajetti qarjy resýrstaryn saqtap otyr. Boryshtyq júktemeniń tómendeýi aldaǵy qarjylandyrýdy tıimdi josparlaýǵa jáne Korporatsııaǵa júktelgen mindetterdi turaqty oryndaýǵa jol ashady, — dedi Ildar Ismagýlov.
Korporatsııa boryshtyq júktemeni odan ári tómendetý, qarjy resýrstaryn basqarý tıimdiligin arttyrý jáne agrarlyq sektordy turaqty qarjylandyrý baǵytyndaǵy jumysyn jalǵastyrady.
«Azyq-túlik kelisimshart korporatsııasy» UK» aktsıonerlik qoǵamy Qazaqstannyń astyq naryǵynda operator fýnktsııalaryn júzege asyratyn ulttyq kompanııa. Korporatsııa astyq naryǵyndaǵy turaqtylyqty qamtamasyz etýge qatysady, aýyl sharýashylyǵy ónimderin satyp alý jáne ótkizý jumystaryn júrgizedi, sondaı-aq otandyq aýyl sharýashylyǵy taýar óndirýshilerin qoldaýǵa baǵyttalǵan qarjylyq quraldardy usynady.
«Azyq-túlik kelisimshart korporatsııasy» UK» aktsıonerlik qoǵamynyń jalǵyz aktsıoneri — QR Aýyl sharýashylyǵy mınıstrligi.
Buǵan deıin Azyq-túlik korporatsııasy bıyl agrarshylardy qoldaýǵa 65,7 mlrd teńge bóletinin jazdyq.
