Azyq-túlik kelisimshart korporatsııasy 47,5 mlrd teńgege 380 myń tonna astyq satty
ASTANA. KAZINFORM - «Azyq-túlik kelisimshart korporatsııasy» jalpy somasy 47,5 mlrd teńgege 380 myń tonna astyqty ótkizý boıynsha kelisimsharttar jasasty. Onyń ishinde 157 myń tonna azyq-túlik bıdaıy eksportqa shyǵarylmaq, qazirdiń ózinde jetkizý jónindegi kelisimderge qol qoıyldy.
QR Aýyl sharýashylyǵy mınıstrligi baspasóz qyzmetiniń habarlaýynsha, búginde astyq Qytaı, Aýǵanstan, Tájikstan jáne Ázerbaıjan elderine qarqyndy túrde tasmaldanyp jatyr.
Іshki naryqqa 222,7 myń tonna astyq jetkizý jóninde kelisimsharttar jasaldy. Un tartý kásiporyndarynyń ótinimderi boıynsha 36,8 myń tonna astyq jóneltildi. Qus jáne mal sharýashylyǵy kásiporyndary 21 myń tonna, qaıta óńdeý kásiporyndary 40 myń tonna, aýyl sharýashylyǵy taýaryn óndirýshiler 33,4 myń tonna astyq satyp aldy. Qalǵan astyq kólemi kommertsııalyq sharttarmen satyldy.
Ótken aptada ETC taýar bırjasy arqyly kólemi 10 myń tonna 3-synypty bıdaıdyń iri partııasyn satý mámilesi jasaldy. Satyp alýshy Qostanaı oblysyndaǵy un tartý kásiporny.
Astyq baǵasynyń qubylmalylyǵy jaǵdaıynda ulttyq operator eń aldymen ishki naryqty turaqtandyrýǵa jáne azyq-túlik qaýipsizdigin qamtamasyz etýge basymdyq beredi. Mundaı tásil áleýmettik mańyzy bar azyq-túlik ónimderin óndiretin qaıta óńdeý jáne aýyl sharýashylyǵy kásiporyndaryna baǵa aýytqýlarynyń áserin tómendetýge múmkindik beredi.
Al ishki naryqta astyqtyń sapalyq kórsetkishterine aıryqsha nazar aýdarylady. Bıdaı baǵasy, dán mańyzyna qaraı:
• 23–24% – tonnasyna 102 myń teńgeden;
• 25–26% – tonnasyna 105 myń teńgeden;
• 27–28% – tonnasyna 114 myń teńgeden bastalady.
Qus jáne mal sharýashylyǵy kásiporyndaryn ataýly qoldaý maqsatynda 4-synypty bıdaı tómendetilgen bekitilgen baǵamen – tonnasyna 95 myń teńgeden satylyp jatyr. Osylaısha, otandyq aýyl sharýashylyǵy kásiporyndary Azyq-túlik kelisim-shart korporatsııasynan jemdik astyqty qoljetimdi sharttarmen satyp alýǵa jol ashyldy.
Qaıta óńdeýshiler, ımporttaýshylar jáne agroqurylymdar tarapynan qosymsha 235 myń tonna astyq satyp alýǵa ótinimderdiń túsýin eskere otyryp, ulttyq operatordyń astyq qory azyq-túlik bıdaıy men jemshóptiń memlekettik rezervin qosa alǵanda 875,2 myń tonnany quraıdy.
Qalyptastyrylǵan resýrstar ishki naryqtyń qajettiligin tolyq qamtamasyz etýge jáne eldegi azyq-túlik turaqtylyǵyn saqtaýǵa jol ashady.
Osyǵan deıin Qazaqstannyń astyq eksporty 11,7 mln tonnaǵa jetkeni týraly jazdyq.
