Azyq-túlik qaýipsizdigi týraly zań qabyldaýymyz qajet – Májilis depýtaty
ASTANA. KAZINFORM – Elimizde agrarlyq áleýet zor bolǵanymen, birqatar negizgi azyq-túlik taýarlary boıynsha ımportqa táýeldilik áli de saqtalyp otyr. Bul týraly Premer-Mınıstriniń orynbasary – Ulttyq ekonomıka mınıstri Serik Jumanǵarınge saýal joldaǵan Májilis depýtaty Jıgýlı Daırabaev aıtty.
- Memleket basshysy Qasym-Jomart Kemeluly Toqaev Ulttyq quryltaıdyń besinshi otyrysynda el damýynyń jańa kezeńine baǵyttalǵan, mazmuny tereń, jaýapkershiligi zor, eldi eleń etkizetin, bolashaqqa naqty baǵdar beretin sóz sóıledi. Buǵan deıin de Prezıdentimiz áleýmettik ádilettilik pen ekonomıkalyq turaqtylyqty qalpyna keltirip qana qoımaı, halqymyzdyń senimin oıatyp, rýhyn kóteretin naqty sheshimder qabyldap, mańyzdy jumystar atqardy. Biz óńirlerge shyǵyp, halyqpen kezdesken sátterde eńbek adamdarynyń, fermerlerdiń bolashaqqa zor úmitpen qaraıtynyn kórgende, jasalyp jatqan reformalardyń oń nátıjesin baıqap júrmiz, - dedi ol.
Onyń aıtýynsha, Eýrazııalyq ekonomıkalyq odaq aıasynda otandyq aýyl sharýashylyǵy ónimderin óńdeý salasynyń básekege qabilettiligi tómendep, keıbir baǵyttar boıynsha shetelden keletin, sýbsıdııalanatyn ónimderdiń qysymyna ushyrap otyrýy alańdatady.. Bul – tikeleı azyq-túlik qaýipsizdigine tónetin qater.
- Elimizde agrarlyq áleýet zor bolǵanymen, birqatar negizgi azyq-túlik taýarlary boıynsha ımportqa táýeldilik áli de saqtalyp otyr. Óńdeý ónerkásibiniń jetkilikti damymaýy, saqtaý jáne logıstıka júıesiniń álsizdigi, aýyl sharýashylyǵy óndirýshilerin uzaq merzimdi ári ádil baǵamen ótkizý tetikteriniń bolmaýy – osy salanyń júıeli problemalaryna aınalyp, aýyl ekonomıkasynyń álsireýine ákeletin qaýip tóndirip otyr, - dedi májilismen.
Depýtattyń aıtýynsha, klımattyń ózgerýi, sý tapshylyǵy, jahandyq geosaıası turaqsyzdyq pen logıstıkalyq tizbekterdiń úzilýi jaǵdaıynda azyq-túlik qaýipsizdigi burynǵydan da ózekti bola tústi. Mundaı jaǵdaıda memleket bul máseleni tek salalyq baǵdarlama nemese ýaqytsha sharalar arqyly emes, naqty zańnamalyq negizde sheshýi qajet.
- Osy turǵyda Májilistegi «Aýyl» partııasy fraktsııasy bastamashy bolyp otyrǵan «Azyq-túlik qaýipsizdigi týraly» zań jobasyn qabyldaý – ýaqyt talaby dep esepteımiz, - dedi Jıgýlı Daırabaev.
Onyń paıymynsha, atalǵan zań jobasy:
- azyq-túlik qaýipsizdigin memlekettiń strategııalyq basymdyǵy retinde aıqyndaýǵa;
- ishki naryqty qorǵaýdyń naqty ári tıimdi tetikterin qalyptastyrýǵa;
- otandyq aýyl sharýashylyǵy óndirýshilerin júıeli qoldaýǵa;
- óndiris, óńdeý, saqtaý jáne ótkizý tizbegindegi teńgerimsizdikti joıýǵa baǵyttalǵan mehanızmderdi zań júzinde belgileýge múmkindik beredi.
- Bul zań – bir rettik qujat emes, aýyldy saqtap qalýǵa, fermerdi qorǵaýǵa jáne eldi azyq-túlikpen óz kúshimen qamtamasyz etýge baǵyttalǵan uzaq merzimdi strategııalyq sheshim. Ol Memleket basshysy keshegi Ulttyq quryltaıda belgilep bergen ádiletti ekonomıka men myqty memleket qurý qaǵıdattarymen tolyq úndesedi, - dedi Májilis depýtaty.
Aıta keteıik, búgingi jalpy otyrysta depýtattar qazaq-qyrǵyz shekarasyndaǵy ótkizý pýnkteri týraly kelisimge ózgeris engizip, IKAO-ǵa qatysty qujatty qabyldady.