Azyq-túlik ınflıatsııasy bizdi de qatty alańdatady — Serik Jumanǵarın

ASTANA. KAZINFORM — Áleýmettik mańyzy bar azyq-túlik baǵasyn retteýden birde-bir dúken bankrot bolǵan joq. Bul týraly Premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.

— Búginde áleýmettik mańyzy bar azyq-túliktiń 19 túriniń baǵasy retteledi. Ázirshe, budan birde-bir dúken bankrot bolǵan emes. Al qazir biz engizip jatqan shara ýaqytsha. Shamaly sanyn ulǵaıtyp, bul tizbeni 33-ke deıin jetkizemiz. Bul ınflıatsııa úsh quramdasynyń ishinde dál azyq-túlik ınflıatsııasy bizdi qatty alańdatýymen baılanysty. Óıtkeni, uzaq ýaqyttan beri bir azyq-túliktiń baǵa ósiminiń qarqyny baıqalady ári bul maýsymmen baılanysty emes, — dedi vıtse-premer Úkimet otyrysynan keıingi brıfıngte. 

Onyń paıymynsha, qymbattaý alyp-satarlyqpen baılanysty. 

— Saýda mınıstrligi eldegi barlyq ımport ónimder ákeletin iri kóterme saýda jasaýshylardy shaqyryp, olarmen sóılesti, sebepterin anyqtady. Biz muny jaı ǵana engizip qoımaımyz. Úı janyndaǵy dúkender men qajettilik bolǵan jaǵdaıda iri kompanııalarǵa qoldaý kórsetýge daıynbyz. Bul kásiporyndardy bankrottyqqa alyp keledi dep oılamaımyz, — dedi Serik Jumanǵarın.

Aıta keteıik, áleýmettik mańyzy bar azyq-túlik taýarlarynyń tizbesine qyzanaq, qııar, alma, sıyr eti súıegimen, súıeksiz sıyr eti, tartylǵan et, qoı eti súıegimen, jańa nemese salqyndatylǵan balyq, muzdatylǵan balyq, ýltrapasterlengen sút, qaımaq, qatty irimshik, qara shaı qosylady.