Azyq-túlik, et jáne qant segmenti: elde ınvestıtsııalyq múmkindik qandaı
ASTANA. KAZINFORM — Qazaqstan Respýblıkasynyń Ulttyq ekonomıka vıtse-mınıstri Arman Qasenov iske asyrylmaǵan aýqymdy ınvestıtsııalyq múmkindikter jaıynda aıtty.
- Importty almastyrý áleýeti bar jobalarǵa toqtalǵym keledi. Jeke bıznespen qatar, jekelegen mınıstrlikter de bul turǵyda tıisti baǵyttardy belgilep jatyr. Mysaly, Aýyl sharýashylyǵy mınıstrligi azyq-túlikke qatysty 12 baǵyt pen jalpy quny 4 trln teńgeden asatyn jobalar pýlyn anyqtady. Sonymen qatar, Ónerkásip jáne qurylys mınıstrligi azyq-túlik emes taýarlar toptary boıynsha osyndaı jumys júrgizdi, - dedi A. Qasenov Senattaǵy ekonomıka ósimine arnalǵan Úkimet saǵatynda.
Onyń aıtýynsha, jylyjaı segmentinde 800 mln dollardan asatyn áleýetti ınvestıtsııalyq múmkindikter anyqtaldy. Et jáne et ónimderin óndirýde olardyń quny 1,1 mlrd dollardan asady.
- Belgili bir ónim toptarynda ımportty almastyrý úshin de, eksportty aıtarlyqtaı arttyrý úshin de áleýet bar. Qant segmentinde ımport 55 paıyzdy qurady. Sonymen birge, otandyq zaýyttar negizinen ımporttyq shıkizatty óńdep jatyr. Osy oraıda 800 mln dollardan astam somaǵa áleýetti ınvestıtsııalyq múmkindikter anyqtaldy. Kórip otyrǵanymyzdaı, naryq barlyq osyndaı máselelerdi qamtyp turǵan joq. Sondyqtan iske asyrylmaǵan aýqymdy ınvestıtsııalyq múmkindikter bar, - dedi vıtse-mınıstr.
Buǵan deıin habarlanǵandaı, Úkimet azyq-túlik sektorynda ımportty almastyrýǵa bolatyn segmentterdi aıqyndady.
