Azyq-túlik baǵasyn endi jasandy ıntellekt baqylaıdy
ASTANA. KAZINFORM — Áleýmettik mańyzy bar azyq-túlik taýarlarynyń (ÁMAT) baǵasyn retteý baǵytynda jyldyń basynan bastap ÁMAT tizimi 19-dan 31 ataýǵa deıin keńeıtildi. Osyǵan baılanysty baqylaý sharalaryn kúsheıtý qajettiligi týyndap otyr. Bul týraly Saýda jáne ıntegratsııa mınıstrligi málim etti.
— Aǵymdaǵy jyldyń sáýir aıynyń ortasyndaǵy jaǵdaı boıynsha, ÁMAT-qa belgilengen shekti saýda ústemesin asyrǵany úshin 1 406 ákimshilik aıyppul salyndy. Bul kórsetkish 2025 jyl boıy osy bap boıynsha tirkelgen quqyq buzýshylyqtardyń jalpy sanynyń (2 913) shamamen 50 paıyzyna teń, — dep habarlady vedomstvodan.
Baǵa qalyptastyrý tizbegindegi deldaldyq shemalardy anyqtaý boıynsha óńirlik komıssııalardyń jumysy jandandy. El boıynsha barlyǵy 372 otyrys ótkizilip, 1 092 zań buzýshylyq anyqtaldy, 974 hattama toltyryldy, taýar ótkizý tizbeginen 118 deldal shyǵaryldy.
— Negizgi baǵyttardyń biri — elektrondyq shot-faktýralardy taldaý. Jyl basynan beri saýda ústemesin asyrý táýekeli bar 2 361 jaǵdaı anyqtalyp, olar boıynsha málimetter óńirlik bólimshelerge egjeı-tegjeıli qaraý jáne tıisti sharalar qabyldaý úshin joldandy, — delingen habarlamada.
Aıta ketý kerek, mınıstrlik baqylaý júrgizýdiń zamanaýı tásilderin engizýde. Elektrondyq shot-faktýralardy taldaý barysynda tsıfrlyq quraldar, sonyń ishinde jasandy ıntellekt tehnologııalary qoldanylady. Bul qysqa ýaqyt ishinde úlken kólemdegi derekterdi óńdeýge jáne quqyq buzýshylyqtardy anyqtaý tıimdiligin arttyrýǵa múmkindik beredi.
Mınıstrliktiń málimetinshe, tıimsiz deldaldyqty boldyrmaý úshin derekterdi taldaýdyń jańa ádisteri qoldanylady. Atap aıtqanda, bir óńir sheńberinde úsh jáne odan da kóp kóterme býyn qatysatyn tizbekter, sondaı-aq bir kún ishinde jasalǵan tórt jáne odan kóp býyndy mámileler anyqtalady. Budan bólek, mámile qatysýshylarynyń ózara baılanysy da taldanady. Anyqtalǵan barlyq táýekelder óńirlik komıssııalardyń qaraýyna jiberiledi. Olardyń mindeti — saýda zańnamasynyń saqtalýyn baǵalap, tıimsiz deldaldardy tizbekten shyǵarý boıynsha sharalar qabyldaý.
Qazaqstan Respýblıkasy Saýda jáne ıntegratsııa mınıstrligi memlekettik baqylaý tetikterin odan ári jetildirýdi jáne áleýmettik mańyzy bar azyq-túlik taýarlary baǵasynyń turaqtylyǵyn qamtamasyz etýge baǵyttalǵan sharalardy jalǵastyrady.
Buǵan deıin Astanada azyq-túlik baǵasyna baqylaý kúsheıgenin jazdyq.