Azyq-túlik baǵasy: elde saýda ústemesi úshin jazalanǵandar kóbeıdi
ASTANA. KAZINFORM – Bıyl elimizde azyq-túlik baǵasyna saýda ústemesin asyra qosqandar kóbeıgen. Bul týraly Saýda jáne ıntegratsııa mınıstrligi málim etti.
Atap aıtqanda, áleýmettik mańyzy bar azyq-túlik taýarlaryna baǵanyń negizsiz ósýine jol bermeý maqsatynda Qazaqstan Respýblıkasynda 15% mólsherindegi saýda ústemesiniń shekti deńgeıi belgilendi. Bul talaptyń oryndalýyna Mınıstrlik tarapynan turaqty monıtorıng júrgiziledi. Qadaǵalaý sharalary Qazaqstan Respýblıkasy zańnamasynyń talaptaryna sáıkes jáne belgilengen tártippen júzege asyrylady.
- Osy jyldyń basynan beri Qazaqstan Respýblıkasynyń Ákimshilik quqyq buzýshylyq týraly kodeksiniń 204-4-babyna sáıkes, saýda ústemesiniń belgilengen shekti mólsherin asyrǵany úshin 3 449 saýda sýbektisi jaýapkershilikke tartyldy. Salynǵan ákimshilik aıyppuldyń jalpy somasy 82,5 mln teńgeden asty. Máselen, 2025 jyldyń tıisti kezeńinde atalǵan bap boıynsha 2 191 saýda sýbektisi jaýapkershilikke tartyldy, al salynǵan ákimshilik aıyppuldyń jalpy somasy 39,6 mln teńgeden asty, - delingen mınıstrliktiń Kazinform agenttigine bergen jaýabynda.
Bul rette 2025 jyldyń tıisti kezeńimen salystyrǵanda, 2026 jyly jaýapkershilikke tartylǵan saýda sýbektileriniń sany 57,4%, al salynǵan ákimshilik aıyppuldyń jalpy somasy 108,3% ósti. Osy jaǵdaı belgilengen saýda ústemeleriniń shekti mólsherin buzýǵa tosqaýyl qoıýǵa qatysty ákimshilik áreket etý sharalarynyń kúsheıgenin kórsetedi.
Saýdanyń ústeme baǵasyn asyrǵany úshin salynatyn aıyppul mólsheri:
- shaǵyn kásipkerlik sýbektilerine – 5 AEK;
- orta kásipkerlik sýbektilerine – 35 AEK;
- iri kásipkerlik sýbektilerine – 150 AEK.
Eger ákimshilik jaza qoldanylǵannan keıin bir jyl ishinde qaıtalap jasalǵan is-áreket úshin aıyppul somasy eki eselenedi.
Aıta keteıik, jaqynda Quryltaı depýtaty «úı janyndaǵy» dúkenderge ústemaqy úshin salynatyn aıyppuldy alyp tastaýdy usyndy.
