Azııalyq Qazaq Kuresi Assotsıatsııasy quryldy
TÚRKІSTAN. KAZINFORM – Búgin Túrkistan tórindegi Olympic Center sport kesheninde eresekter arasynda tól sportymyz – qazaq kúresinen Azııa birinshiliginiń alaýy tutanady.
Atalǵan doda barysynda Qazaq Kuresi Assotsıatsııasynyń jınalysy ótip, tól sportymyzdy ary qaraı damytýǵa baǵyttalǵan birqatar másele kóterildi.
Atap aıtsaq, qaýymdastyqtyń jumysyna qysqasha esep berilip, strategııalyq baǵdardy aıqyndap, sheteldik jáne oblystyq federatsııalarǵa tapsyrmalar jáne esep berý merzimderi anyqtaldy.
Jınalysta Qazaq Kuresi Assotsıatsııasynyń bas dırektory Damır Bekbosynov sóz sóılep, qaýymdastyqtyń qyzmetine baılanysty esep berdi.
– Búgin biz tól sportymyz – qazaq kúresiniń damý jolyndaǵy jańa kezeńinde turmyz. Assotsıatsııanyń bastamasymen álem jáne Azııa chempıonattary, álem kýbogtary men halyqaralyq týrnırler turaqty túrde uıymdastyrylyp keledi. Atap aıtqanda, búgingi tańda qazaq kúresinen 11 álem chempıonaty, 13 Azııa chempıonaty, 6 álem kýbogy, sondaı-aq 6 Eýropa chempıonaty men 2 Afrıka chempıonaty uıymdastyryldy. Sonymen qatar tóreshiler men jattyqtyrýshylarǵa arnalǵan biryńǵaı attestatsııalaý men biliktilikti arttyrý kýrstary ótti, - dep atap ótti ol.
Odan bólek Damır Bekbosynov UWW jáne ózge de halyqaralyq federatsııalarmen jasalǵan seriktestik arqasynda jarystardy uıymdastyrýdyń elektrondyq zamanaýı Arena jáne Athena elektrondyq júıeleri tolyq qoldanysqa berilgenin atap ótti. Osynyń barlyǵy Assotsıatsııanyń kásibı deńgeıde jáne halyqaralyq standarttarǵa saı qyzmet etýine múmkindik bergenin tilge tıek etti.
Sondaı-aq jıynda belgili bolǵandaı, qazaq kúresiniń turaqty damýy men strategııalyq sheshimderdiń tıimdi júzege asýy úshin Assotsıatsııada Atqarýshy komıtet quryldy. Onyń quramyna Týrızm jáne sport mınıstri, Assotsıatsıynyń prezıdenti Erbol Myrzabosynov, Mádenıet jáne aqparat mınıstrliginiń apparat basshysy, qaýymdastyqtyń vıtse-prezıdenti Rınat Muhamedqalı, Mınıstrliktiń Sportty damytý dırektsııasynyń dırektory, vıtse-prezıdent Erlan Estek, Ulttyq jáne at sporty túrleri ortalyǵynyń dırektory, vıtse-prezıdent Qaırat Pazylbek, Qazaq Kuresi qaýymdastyǵynyń bas dırektory, hatshy Damır Bekbosynov, Strategııalyq josparlaý jáne reformalar agenttigi apparatynyń basshysy Batyrbek Ábdildın jáne Shymkent qalasynyń kókpar federatsııasynyń prezıdenti Baltabaı Asan kirdi. Bul organ Assotsıatsııanyń uzaq merzimdi damý strategııasyn iske asyryp, qabyldanǵan sheshimderdiń oryndalýyn úılestirip otyrmaq.
– Atqarýshy komıtettiń quramyna sport salasynyń tájirıbeli basshylary men mamandary endi. Olar ulttyq jáne halyqaralyq deńgeıde uıymdastyrýshylyq, ádistemelik jáne ákimshilik protsesterdiń barlyǵyn úılestirip, Assotsıatsııa jumysynyń ashyqtyǵy men tıimdiligin qamtamasyz etpek. Osylaısha, Qazaq Kuresi Assotsıatsııasynyń basqarý júıesi qazirgi zaman talabyna saı ınstıtýtsıonaldy deńgeıge kóterildi.
Basqarý tıimdiligin qamtamasyz etý maqsatynda Assotsıatsııamyzda 8 komıtet pen 3 departament qurylǵan bolatyn. Olar tórelik, medıtsına, halyqaralyq yntymaqtastyq, marketıng, damý jáne kadr saıasaty sııaqty baǵyttardaǵy naqty mindetterdi júzege asyryp jatyr, - dedi Damır Bekbosynov.
Sonymen qatar ol Azııalyq Qazaq Kuresi Assotsıatsııasynyń resmı túrde qurylyp, jumysyn bastaǵanyn erekshe atap ótti.
– Osy oraıda Azııalyq Qazaq Kuresi Assotsıatsııasy qurylǵany týraly jaǵymdy jańalyqpen bólisýge ruqsat etińizder. Bul qazaq kúresin Azııalyq jáne Olımpıadalyq keńistikke shyǵarý jolyndaǵy kelesi tarıhı qadamdardyń biri ekeni sózsiz. Bul jańa qurylym Azııa qurlyǵyndaǵy barlyq ulttyq federatsııanyń jumysyn biriktirip, biryńǵaı damý strategııasy men jarys kúntizbesin aıqyndaıdy. Sondaı-aq sportshylar men jattyqtyrýshylardyń halyqaralyq deńgeıde attestatsııadan ótýin qamtamasyz etedi jáne United World Wrestling (UWW) jáne Olımpıadalyq Keńes (OCA) standarttaryna tolyq sáıkes damý strategııasyn qalyptastyrady, - dep atap ótti.
Jınalys barysynda jańadan qurylǵan Federatsııanyń basshylyq quramy da belgili boldy.
– Harısh Tııagı – Prezıdent, Parvın Tııagı – Bas hatshy laýazymyna taǵaıyndaldy. Osy oraıda, alda Azııalyq Qazaq Kuresi Assotsıatsııasynyń Atqarýshy komıtetiniń quramy jasaqtalady degen úmittemin. Qazaq Kuresi Assotsıatsııasynyń bas dırektory retinde men 2026 jyldan bastap bizdiń barlyq sheteldik federatsııalar mindetti túrde eresekter arasyndaǵy el chempıonatyn jylyna 1 ret ótkizýdi, ár toqsan saıyn ZOOM platformasy arqyly jınalysqa qatysýdy tapsyramyn, - Damır Bekbosynov.
Óz kezeginde Qazaq Kuresi Assotsıatsııasynyń bas dırektory qazaq kúresin damytýdaǵy basty basty maqsatymen de bólisti.
– Assotsıatsııanyń uzaq merzimdi strategııalyq maqsaty – qazaq kúresin Azııa jáne Olımpıada oıyndarynyń baǵdarlamalaryna qosý. Bul baǵyttaǵy jumystardy Olımpıadalyq Keńestiń (OCA) talaptaryna saı júrgizip jatyrmyz, - dedi ol.
Sonymen qatar qazaq kúresin Azııa oıyndaryna engizý úshin qandaı jumystar atqarylyp jatqanyn da tilge tıek etti.
– Bizdiń strategııalyq baǵytymyzdaǵy basty maqsatymyz – ár sheteldik federatsııanyń óziniń ulttyq olımpıadalyq komıtetimen moıyndalýy jáne de memlekettik sport túrleri reestrine qazaq kúresin engizý. Osy jolda kóptegen jumystar atqarylyp jatyr. United World Wrestling-tiń músheliginde bolý da mańyzdy. Sebebi, biz halyqaralyq jarystarymyzdy osy uıymnyń aıasynda ótkizemiz. Aldaǵy ýaqytta qazaq kúresiniń ádistemelik bazasyn, qaýipsizdik nusqaýlyǵyn jáne qazaq kúresiniń jańartylǵan erejesin resmı saıtymyzda jarııalaımyz. Sondaı-aq qazaq kúresiniń 100 jattyǵý vıdeo nusqaýlyǵyn daıyndaýdy josparlap otyrmyz. Ár sheteldik federatsııa Assotsıatsııa tarapyna únemi jan-jaqty qoldaý bildirýge daıynbyz, - dedi Damır Bekbosynov.
Esterińizge sala keteıik, osyǵan deıin Túrkistan tórinde qazaq kúresinen Azııa birinshiligi ótetini týraly jazǵan bolatynbyz.