Azıadanyń tarıhynda alǵash ret shaıbaly hokkeıden Qazaqstannyń erler quramamasy altynnan alqa taqty

Búgin, aqpannyń 6-sy kúni Astanadaǵy «Qazaqstan» sport saraıynda 7-Qysqy Azııa oıyndary aıasyndaǵy shaıbaly hokkeıden aqtyq oıynda bizdiń hokkeıshiler Japonııa quramasymen kezdesip, óz qarsylastaryn 4:1 esebimen jeńdi.

Oıynnyń birinshi kezeńinde eki komanda teń oınap, bir-birine shabýyl jasaýmen boldy. Esep - 0:0. Ekinshi kezeń de osyndaı qarqynmen bastaldy. Osy kezeńniń sońǵy mınýttarda ǵana bizdiń hokkeıshiler qarsylastyń qorǵanysyn buzyp, №14 oıynshy Evgenıı Blohın Japonııanyń qaqpasyna alǵashqy shaıbany saldy. Osydan birer mınót ótkennen keıin onyń attasy Evgenıı Fadeevtiń kómegimen №21 oıynshy Ilıa Solarev ekinshi shaıbanyń avtory atanyp, esepti eseledi. Úshinshi kezeńde №7 oıynshy Maksım Semenovtyń úshinshi shaıbasynan keıin Japonııa quramasy bizdiń qaqpamyzǵa bir shaıba kirgizip, tarazy basyn teńestirýge tyrysty. Biraq №48 oıynshy Roman Starchenko salǵan shaıbadan keıin japonııalyq hokkeıshiler múldem artta qaldy. Esep - 4:1. Aq Azıada aıasyndaǵy shaıbaly hokkeıden erler arasyndaǵy joǵary dıvızıon jarystarynyń jeńimpazy, 7-shi Qysqy Azııa oıyndarynyń altyn alqa ıegeri - Qazaqstannyń qurama komandasy.

Osylaısha bizdiń hokkeıshiler 7- Qysqy Azııa oıyndary aıasynda Japonııamen match-revansh ótkizip, Aq Azıadanyń tarıhynda alǵash ret shaıbaly hokkeıden chempıon atandy. Buǵan deıin 2007 jyly Qytaıdyń Chanchýn qalasynda ótken Azıadada Qazaqstan men Japonııa quramalary kezdesken bolatyn. Ol kezde bizdiń hokkeıshiler kúmis júldege ıe bolǵan.

Búgin Aq Azıadanyń taǵy bir jeńimpazy, qorjynymyzǵa taǵy bir altyn medal salǵan hokkeıshiler komandasyn Úkimet basshysy Kárim Másimov quttyqtap, altyn medaldar taqty. Sondaı-aq is-shara barysynda 2-3-oryndardyń ıegerleri - Japonııa men Koreıa komandalaryna marapat kórsetildi.