Azıadanyń resmı saıty elimizdiń sporttyq jáne týrıstik áleýetin aıqyndaýdy kózdeıdi
ASTANA. 27 qańtar. QazAqparat /Arman Asqarov/ - Búgingi tańda 7-Qysqy Azııa oıyndarynyń resmı saıtynda barlyq qajetti aqparat bar. Búgin «Alaý» stadıonynda ótken baspasóz máslıhatynda «7-Qysqy Azııa oıyndary uıymdastyrý komıtetiniń atqarýshy dırektsııasy» AQ prezıdentiniń keńesshisi Álibek Áldeneı osylaı aıtty.
Baspasóz máslıhaty barysynda málim bolǵandaı, Azıadanyń jańartylǵan veb-saıtynda barsha oqyrman qaýymǵa arnalǵan úsh tildi aqparat bar. Munda bıletterdiń on-laın satylýy qarastyrylǵan. «Bılet» aıdarynda bılettiń qunyn jáne kórermen oryndarynyń ornalasý kestesin kórýge bolady. Saıt elimizdiń sporttyq jáne týrıstik áleýetin aıqyndaýdy kózdeıdi. Bul jerde Azıadanyń tumary, ımıdjdik ónim jáne iri sporttyq nysandar týraly tolyqqandy málimet berilgen. Azıada týraly jańalyqtar, beıne jáne fotomaterıaldar, oqıǵalar kúntizbesi únemi jańartylyp otyrady. «Sonymen qatar 7-Qysqy Azııa oıyndarynyń «Qazaqstan», «Habar» jáne «El arna» arqyly tikeleı kórsetiletindigin atap ótken jón. Onymen birge tikeleı kórsetilimder Azıadanyń barlyq sporttyq alańdarynda júrgiziledi», - deıdi «7- Qysqy Azııa oıyndarynyń uıymdastyrý komıtetiniń atqarýshy dırektsııasy» AQ prezıdentiniń keńesshisi Álibek Áldeneı.
