Azıadanyń Alaý estafetasynda Qazaqstannyń joly boldy
ASTANA. 28 qańtar. QazAqparat /Arman Asqarov/ - Shyny kerek, 7-Qysqy Azııa oıyndarynyń Alaý estafetasynda Qazaqstannyń joly boldy. Búgin elordada ótken baspasóz máslıhatynda Alaý estafetasy dırektsııasynyń beınetúsirý tobynyń jetekshisi Arman Káribaev osylaı aıtty.
Onyń habarlaýynsha, Azııanyń Olımpıada keńesi ornalasqan Ál-Kýveıt qalasynda jaǵylǵan Azıada alaýy kúnniń otymen tutalýy qajet. Sondyqtan Qazaqstan men Kýveıttiń ókilderi ózara keńese kele, kún otyn alýdyń gretsııalyq jolyn emes, jańasha ári zamanýı ádisin qoldanýdy uıǵardy. «Azıada alaýy arnaıy kún sáýlesin jınaıtyn batareıalardyń negizinde jaǵyldy. Mine, osy kezde bizge kún nury asa qajet boldy. Biraq qatty jel turyp, aspanda bulttar qaptap turdy. Sol kezde biz Alladan jaqsy aýa raıdy tiledik. Osydan keıin kún shaıdaı ashyldy. Bizdiń qýanyshymyzda ári tańdanysymyzda shek bolmady. Azıada alaýyn jaǵý rásimi oıdaǵydaı ótti», - deıdi A.Káribaev.
Onyń aıtýynsha, osydan keıin Qazaqstan jerinde de Alaý estafetasy ashyq ári jyly aýa raıy jaǵdaıynda ótti. «Qysta únemi aıaz bolyp turatyn Óskemen qalasynyń ózinde Alaý estafetasy ótken eki kún boıy tek -9-10 gradýs qana sýyq boldy. Al estafeta ótkennen keıin, Óskemendegi aýa raıy kúrt sýyp, -30 gradýsqa deıin bardy», - deıdi ol.
