Azıadanyń tarıhı chempıony: Kelesi kezeńge óte almaıdy dep boljaǵandar boldy
ASTANA. KAZINFORM – Jyl basynda ıyǵyna ota jasatyp, jarty jylǵa jýyq ýaqyt emdelgen Temirlan Tileýles sportqa qaıta oralyp qana qoımaı, Qazaqstan tarıhyndaǵy taekvondodan alǵashqy Azııa oıyndarynyń altynyn jeńip aldy. Tilshilerge bergen suhbatynda Temirlan sportqa qalaı kelgenin, Azıada jarystarynyń qalaı ótkenin aıtyp berdi.
Búgin Aqordada Azııa oıyndary men Azııa paraoıyndarynyń jeńimpazdary jáne júldegerlerin marapattaý rásiminde Memleket basshysy Qasym-Jomart Toqaev Temirlan Tileýlestiń jetistigin erekshe atap ótti.
Sportshynyń aıtýynsha, bul altyn medalǵa jetý joly ońaı bolmaǵan. Jyl basynda ıyǵyna ota jasalyp, alty aı boıy kútingen.
– Tipti jattyǵýǵa qaıta kiriskende sportqa burynǵydaı orala alamyn ba degen kúmán boldy. Dárigerime, ulttyq quramaǵa, bapkerlerime jáne otbasyma alǵys aıtamyn. Barlyǵy maǵan qoldaý kórsetti. Sonyń arqasynda qaıtadan tolyqqandy jattyǵyp, Azııa oıyndarynda úzdik nátıje kórsete aldym, – deıdi Temirlan.
Temirlan eń alǵash 6 jasynda úı mańyndaǵy taekvondo sektsııasyna barǵan. Bul sport túri birden unap, sodan beri jattyǵýyn úzbegen. Bıyl taekvondomen aınalysqanyna 15 jyl tolady.
Osy ýaqyt ishinde ol halyqaralyq jarystarda birneshe ret júldeger atandy. 21 jasqa deıingi sportshylar arasyndaǵy álem chempıonatynda jáne Ýnıversıadada qola medal jeńip alǵan. Eń alǵashqy altyn medalin – Azıada oıyndarynda aldy.
– Buǵan deıin kóbinese úshinshi oryn alyp júrdim. Ásirese, birneshe jarysta sońǵy sekýndtarda ese jibergen kezder boldy. Jeńilisten keıin bárin tastaǵyń keletin sátter bolady. Jattyǵýǵa barǵyń kelmeıdi. Biraq otbasyń men bapkerlerińniń qoldaýyn sezingende, áli oryndalmaǵan basty maqsatyń bar ekenin túsinesiń. Sodan qaıtadan erte turyp, jattyǵýǵa kirisesiń. Al jeńisten keıin jattyǵýdy eshqashan úzgiń kelmeıtin kúsh paıda bolady, – deıdi chempıon.
Temirlannyń aıtýynsha, Azııa oıyndarynda altyn medal alý óte qıyn boldy.
– Jerebe boıynsha birden barlyq favorıtpen kezdesýge týra keldi. Tipti keıbireýler meni kelesi kezeńge óte almaıdy dep boljady. Biraq biz qanshama ýaqyt daıyndaldyq, sol eńbektiń nátıjesin kórdik. Aqyry maqsatymyzǵa jetip, tarıh jasadyq. Jyldar boıǵy eńbegimiz aqtaldy, – deıdi ol.
T. Tileýles Azııa oıyndaryndaǵy tarıhı jeńispen toqtap qalǵysy kelmeıdi. Aldaǵy ýaqytta álem chempıony atanyp, Olımpıada oıyndarynda da jeńis tuǵyryna kóterilýdi kózdeıdi.
– Qazir daıyndyq jaqsy júrip jatyr. Jarystarda da jaqsy nátıje kórsetip kelemiz. Sondyqtan Olımpıada oıyndarynda jaqsy nátıje bolaryna úmittenemin, – deıdi Temirlan Tileýles.
Aıta keteıik, Japonııanyń Aıchı prefektýrasy men Nagoıa qalasynda ótip jatqan jazǵy Azııa oıyndarynda Qazaqstan taekvondodan tarıhı nátıjege qol jetkizdi. Erler arasynda 58 kg deıingi salmaq fınalynda Temirlan Tileýles jeńiske jetip, qazaqtan shyqqan tuńǵysh Azıada jeńimpazy atandy.
