Azıadada tarıhı altyn alǵan Rınata Sultanova elge oraldy
ASTANA. KAZINFORM — Qazaqstanǵa Japonııada ótken XX jazǵy Azııa oıyndarynyń alǵashqy altynyn syılaǵan veloshabandoz Rınata Sultanova elordaǵa oraldy. Bir aıǵa jýyq ýaqyt elden jyraqta bolǵan sportshyny áýejaıdan týǵan-týystary, dostary men tanystary gúl shoqtarymen, Qazaqstannyń týy jáne jyly lebizderimen qarsy aldy, dep habarlaıdy Kazinform tilshisi.
Sultanova Azıadadaǵy basty medalin 20 qyrkúıekte jeńip aldy. Ol tas joldaǵy jeke ýaqyt jarysynda top jaryp, Azııa oıyndarynyń chempıony atandy. Al 2 qazanda sportshy velotrektegi omnıým saıysynda kúmis medal ıelendi.
Sultanovanyń aıtýynsha, ol tas joldaǵy jarysqa jeńiske jetý maqsatymen daıyndalǵan. Sondyqtan altyn medal sportshy úshin mańyzdy nátıje ǵana emes, bir jyl boıy atqarǵan eńbeginiń zaıa ketpegeniniń dáleli boldy.
— Men osy altyn medal úshin daıyndaldym. Ony jeńip alǵanyma óte qýanyshtymyn. Bul men úshin úlken maqtanysh, — dedi ol.
Jeńisten keıin sportshynyń oıy tek medalda bolǵan joq. Sultanova jyl basynda aldyna qoıǵan maqsattarynyń barlyǵyn oryndaýdy mańyzdy sanaǵan.
— Jyl basynda ózime qoıǵan maqsattarymnyń bárin oryndaǵanyma qatty qýandym. Ol baqytty sózben aıtyp jetkizý múmkin emes, — dedi veloshabandoz.
Sportshynyń aıtýynsha, bul nátıjeniń artynda kásibı sportqa tán kúndelikti eńbek — jattyǵý, tártip jáne óz-ózimen turaqty jumys isteý tur.
— Sport — bul tártip. Kún saıyn ómir súrip, jattyǵý jasap, ózińmen jumys isteý kerek, — dedi Sultanova.
Rınata jarys kezinde onyń ónerin jaqyndary da jiti baqylap otyrǵan. Jeńisten keıin sportshyǵa kóptegen quttyqtaý kelgen. Onyń aıtýynsha, telefonyna kirgen kezde onda «habarlamalar teńizi» jınalyp qalǵan.
Endi chempıondy jaqyndary jeke ózderi quttyqtady. Áýejaıda Rınatany Japonııadaǵy jarysy boıy qoldap, jankúıer bolǵan týǵan-týystary, dostary men tanystary kútip aldy.
Sportshy mundaı aýqymdy kezdesýdi kútpegenin aıtty.
— Mundaı keremet qarsy alýdy shynymdy aıtsam, kútpedim. Osynshama qoldaý kórsetip, jankúıer bolǵan barshańyzǵa úlken raqmet, — dep qorytyndylady sportshy.
Buǵan deıin Azıadada qaı sportshylar tarıhqa engenin jazǵanbyz.
