Azıadada olja salǵan qazaqtyń qaısar ulandarynyń jeńisti joly jalǵasa bergeı - G.Ájiǵalıeva, BQO
ORAL. 11 aqpan. QazAqparat /Eljan Eraly/ - Astana men Almatyda ótken qysqy Azııa oıyndarynda short-trekten qazaqtyń tórt jigiti 5 myń metr estafetalyq jarysta qola júldeni ıelengeni belgili.
Sonyń biri Abzal Ájiǵalıev Syrym aýdany Josaly aýyldyq okrýgi turǵyndaryna da erekshe qýanysh syılady.
Abzaldyń jeńgesi Gúlnısa Ájiǵalıevanyń aıtýynsha, Abzal Oral qalasynda dúnıege kelgenimen, balalyq shaǵynyń bir bóligin Josaly topyraǵynda, aǵaıyn-týmanyń ortasynda ótkizdi. Ákesi, ómirden erte ketken Abaıdyń týǵan jeri dep Josalyǵa jıi kelýshi edi. Ol jastaıynan alǵyr, qaısar bolyp ósti. Oral qalasyndaǵy muz aıdyny saraıyndaǵy short-trek úıirmesine baryp, sheberligin shyńdady. 2003 jyly alǵashqy saıysyn 500 metr jáne 800 metr qashyqtyqtan bastady. Sonda bapkeri: «Júldeli oryn alǵandaryń Almatydaǵy jarysqa barasyńdar», depti. Sonda Abzal tobyǵy qajalyp, aıaǵynyń jaraqattanǵanyna qaramaı, baryn saldy. Mine, sondaı bıik maqsatynan áli de aınyǵan emes. Anasy Sholpannyń, aǵaıyn-týystarynyń úmitin aqtaǵan Abzal sońynan ergen baýyrlary Daryn men Darhanǵa qamqor bolyp keledi. «Biz Astana tórinde ótken jarysta short-trekten tuńǵysh júldege qol jetkizgen Aıdar Bekjanov, Artýr Sultanǵalıev, Nurbergen Jumaǵazıev, Abzal Ájiǵalıevterdiń el mereıin asyrar jeńisteri alda dep esepteımiz», - dedi G.Ájiǵalıeva.
