Azıada jeńimpazy Ásem Orynbaı Prezıdentti toıyna shaqyrdy

HІH jazǵy Azııa oıyndarynyń stend atýdan eki dúrkin jeńimpazy jáne qola júldegeri Ásem Orynbaı Prezıdent Qasym-Jomart Toqaevty otaý qurý toıyna shaqyrdy, dep habarlaıdy Kazinform.

«Qurmetti Qasym-Jomart Kemeluly, qadirmendi dostar! Ózderińiz kórgendeı bıylǵy Azııa oıyndarynda báseke joǵary boldy. Degenmen, biz qalaıda jeńiske jetý kerek dep maqsat qoıdyq. Sol maqsatymyzǵa jetip otyrmyz. Bul joly da bizben birge jattyqtyrýshylar jáne sport salasyndaǵy kóptegen maman ter tókti. Daıyndyqqa federatsııa da kóp úles qosty. Sondyqtan bul bizdiń ortaq jeńisimiz dep bilemin. Barshaǵa alǵys aıtamyn!», – dedi Ásem Orynbaı búgin Prezıdentpen kezdesýde.

Sportshynyń aıtýynsha, birlesken jumys bolmasa, nátıjege qol jetkizý múmkin emes.

«Sebebi bizdiń sport túriniń ózindik erekshelikteri bar. Bul jerde tek fızıkalyq kúsh emes, sonymen qatar júıke myqtylyǵy mańyzdy ról atqarady. Biz elimizdiń atyn shyǵarýǵa barlyq kúsh-jigerimizdi jumsaımyz. Keler jylǵy Olımpıada oıyndarynda joǵary nátıje kórsetý úshin kúsh salamyz. Ýáde beremiz!

Qurmetti Qasym-Jomart Kemeluly, men sporttyń arqasynda ózimniń bolashaq jarymdy kezdestirip otyrmyn. Ol da sportshy. Qarasha aıynda bizde toı bolady. Sizdi toıymyzdyń qadirli qonaǵy bolýǵa shaqyramyz», – dedi Azııa oıyndarynyń jeńimpazy.

Aıta keteıik, búgin Memleket basshysy Qasym-Jomart Toqaev Astanada Azııa oıyndarynyń júldegerlerin qabyldady.