Azıada: Jaýyn saldarynan Soldat shatqalyndaǵy qar erip jatqandyqtan, bıatlonnan ótetin jarys erteńge aýystyrylýy yqtımal
ATY. 3 aqpan.QazAqparat. /Erbol Azanbek/- Jaýǵan jańbyrdyń saldarynan qardyń erip jatqandyǵyna baılanysty, Almaty oblysynyń Soldat shatqalyndaǵy shańǵy-bıatlon bıatlon stadıonynda ótýi tıis áıelder arasyndaǵy 15 shaqyrymdyq jekeleı syn jarysy erteńge aýystyrylýy yqtımal.
Aıta keteıik, 7-Qysqy Azııa oıyndarynyń baǵdarlamasyna sáıkes, búgin saǵat 10:00-de erteń ótetin bıatlonnan erler arasyndaǵy 20 shaqyrymdyq jekeleı syn jarysynyń jattyǵýy bastalýy tıis bolatyn. Alaıda qardyń erip ketýine baılanysty jattyǵýlar áli bastalǵan joq. Jarys jolyna jaýapty mamandardyń aıtýynsha, jasandy qardy tym bolmaǵanda aýa-temperatýrasy mınýs úsh gradýsty kórsetip tursa jasaýǵa bolady, al qazir aýanyń temperatýrasy 6 gradýs jylylyqty kórsetip tur. Qazirgi kezde eriktilerdiń kómegimen qar tasylyp, joldarǵa tóselýde.
Osy jaǵdaıǵa baılanysty saǵat 13:00 de bastalýy tıis áıelder arasyndaǵy 15 shaqyrymdyq jekeleı syn jarysynyń máselesi talqylanýda. Aıta keteıik, bul jarysta mamandar jerlesterimiz Marına Lebedeva men Elena Hrýstalevany altynnan basty úmitkerlerdiń qataryna jatqyzyp otyr. Qazaqstandyqtardyń negizgi qarsylastary japondyq Sýdzýkı Fýıýko (Suzuki Fyoko) men Aq Azıadanyń 7,5 shaqyrymdyq sprınt jarysynda chempıon atanǵan Van Chýnlı (Wang Chunli).
Uıymdastyrýshylardyń aıtýynsha jarys jolynyń bir bóligine qar tóselinse qashyqtyq kemip, aınalymdar azaıady, jarystar jalǵasyn tabady. Eger bul másele sheshimin tappasa, jarystar kelesi kúnge jyljytylady.
