Azıada: tsıfrlar sóıleıdi
2023 jylǵy 23 qyrkúıek pen 8 qazan aralyǵynda Qytaıdyń Hanchjoý qalasynda HІH jazǵy Azııa oıyndary ótedi, dep habarlaıdy QazAqparat Týrızm jáne sport mınıstrligine silteme jasap.
Osy aralyqta sary qurlyqtaǵy 45 eldiń 15 myńnan astam ókili 40 sport túrinen 481 medal jıyntyǵyn sarapqa salady. Oıyndardyń ashylý rásimi 23 qyrkúıekte Olımpıada sport ortalyǵy stadıonynda ótedi.
Qazaqstan Hanchjoý qalasyna 30 sport túrinen 524 atlet (262 er, 262 áıel) aparady. Onyń ishinde Olımpıada baǵdarlamasyna kiretini 27, qalǵan úsheýi olımpıadalyq emes sport túri. Sonymen qatar, aldaǵy dodada sporttyń 8 túrinen: boks, sadaq atý, qazirgi bessaıys, júzý, breıkıng, kógaldaǵy hokkeı, tennıs pen jeńil atletıkadan Parıj Olımpıadasyna lıtsenzııalar oınatylady.
Sondaı-aq sporttyń 4 túrinen: taekvondo, dzıýdo, trıatlon, badmıntonnan reıtıngtik upaılar sarapqa salynady. Aıta keteıik, Azııa oıyndary- Azıada dep te atalady - Azııa Olımpıadalyq keńesiniń (AOK) basqarýymen Azııa qurlyǵynyń sportshylary arasynda 4 jylda bir ret ótetin keshendi sporttyq jarys.
Halyqaralyq Olımpıada komıtetimen resmı túrde kontınenttik oıyndar retinde tanylǵan. Qazaqstan 1994 jyldan beri Azııa oıyndaryna segizinshi ret qatysady.
