AZIADA: Shańǵymen baǵdarlaý sportynan Mıhaıl Sorokın chempıon atanyp, qurama qorjynyna 13-altyn medaldi saldy
ATY. 2 aqpan. QazAqparat /Erbol Azanbek/ - Qazaqstandyq sportshy Mıhaıl Sorokın shańǵymen baǵdarlaý sportynan ortasha qashyqtyqqa jarysýda 7-Qysqy Azııa oıyndarynyń chempıony atandy.
Osylaısha ol Qazaqstan quramasynyń qorjynyna 13-altyn júldeni saldy. Jerlesimiz ara qashyqtyqty 35 mınýt 33 sekýndta eńserdi. Kúmis júldeni taǵy bir jerlesimiz Vıtalıı Lılıchenko ıelendi. Ol komandalasynan 6 mınýt 55 sekýndqa qalyp qoıdy. Qola júlde Iran sportshysy Bıdjan Kangarlýǵa (Bijan Kangarloo) buıyrdy.
Aıta keteıik, bul Mıhaıl Sorokınniń 7-Qysqy Azııa oıyndaryndaǵy 2-altyn medali. Budan eki kún burynǵy jarysta ol sprınterlik jarysta chempıon atanǵan bolatyn. Sporttyń bul túrinen bizdiń komanda Azıadaǵa qatysýshylardyń ishinde birinshi orynda keledi.
Budan buryn habarlaǵanymyzdaı, búgin qazaqstandyq sportshy Olga Novıkova da shańǵymen baǵdarlaý sportynan ortasha qashyqtyqqa jarysýda Aq Azıadanyń oıyndarynyń chempıony atandy, taǵy bir jerlesimiz Evgenııa Kýzmına kúmis medaldy jeńip aldy. Budan eki kún burynǵy jarysta Olga Novıkova birinshi oryn, al Evgenııa Kýzmına úshinshi oryn alǵan bolatyn.
