Azıada oıyndarynan kemi 2 altyn, 1 kúmis joǵaltyp otyrmyz - Myrzaǵalı Aıtjanov
ASTANA. QazAqparat - Bıyl Indonezııada ótetin jazǵy Azıada oıyndarynda biz kemi eki altyn, bir kúmis júldeden aıyrylyp otyrmyz. Bul týraly QazAqparat tilshisine bokstan Qazaqstan ulttyq quramasynyń bas bapkeri Myrzaǵalı Aıtjanov aıtyp berdi.
- Azıada oıyndarynyń baǵdarlamasynan eń negizgi 81, 91 jáne 91 keliden joǵary úsh salmaq dárejesin alyp tastaǵany durys bolǵan joq. Bul salmaqtarda Azıadada Ádilbek Nııazymbetov, Vasılıı Levıt jáne Qamshybek Qońqabaev basty úmitkerler bolatyn.
- Eger, atalǵan salmaqtaǵy boksshylar Azıada oıyndaryna qatyssa, el qorjynyna mindetti túrde medal salar ma edi?
- Árıne, úsheýi de medaldan basty úmitti boksshylar. Aıtalyq, Ádilbek Nııazymbetov bir emes eki birdeı Olımpıadanyń kúmis júldegeri. Al Vasılıı Levıt te Rıoda altynǵa bergisiz kúmis júldeni utty. Al Qamshybek Qońqabaev bolsa sońǵy kezderi el nazaryn ózine aýdaryp júrgen azamat. Úsheýi de sen tur, men ataıyn dep turǵan jigitter. Kemi eki altyn, bir kúmis júldeden qaǵylǵaly otyrmyz.
- Bul shekteý barlyq eldiń boksshylaryna birdeı júrgizilgeni belgili. Ózge boksshylarymyzdan kimder Azıadada top jarýy múmkin?
- Iá, bul shekteý bizge ǵana emes, Azıadaǵa qatysatyn barlyq elderge birdeı. Sondyqtan, ókinýdiń qajeti joq. Endi, qalǵan jeti salmaqta bar kúshimizdi salýǵa tyrysamyz. Al, ázirge «anaý top jarady, mynaý júldege iligedi» dep aıtý erterek.
- Bul úsh salmaqty ne úshin alyp tastady dep oılaısyz?
- Ol jaǵy bizge de túsiniksiz. Bizde jaqynda estip, bilip jatyrmyz.
- Olımpıada oıyndarynda da osylaı jartylaı aýyr jáne aýyr salmaqtardy alyp tastaýy múmkin be?
- Olaı bolmaıdy degen úmittemin. Buıyrsa Tokıo Olımpıadasyna tolyq quramda baramyz degen senimdemiz.
- Qazirgi josparlaryńyzben bólise ketseńiz?
- Biz osy sáýirdiń 16-sy kúni Ýkraınaǵa baryp, sol jerde birikken oqý-jattyǵý jıynyna qatysamyz. Ary qaraı joldastyq kezdesý bolady. Al mamyr aıynda Reseı, AQSh, Qytaı, Belarýs, Gollandııa sııaqty bir qatar eldermen joldastyq kezdesýlerimiz bar jáne Prezıdent kýbogy jarysyna qatysamyz.
- Suhbatyńyzǵa rahmet!
