Azıada oıyndary alaýynyń estafetasy - Tarazda
JAMBYL OBLYSY. 13 qańtar. QazAqparat /Galına Skrıpnık/ - Tarazdyń «Dostyq» ortalyq alańynda dál qazirgi sátte Jetinshi qysqy Azıada oıyndarynyń Alaý estafetasy aıaqtalýda. Taraz, Almatydan keıin Azıada alaýyn qabyldaǵan ekinshi qala atanyp otyr.
«Qazaqstan - Azıada oıyndaryn ótkizip otyrǵan tórtinshi el jáne bul kezdeısoq emes, bul Elbasymyzdyń eńbegi»,- dep atap kórsetti Estafeta aldynda sóz sóılegen Jambyl oblysynyń ákimi Qanat Bozymbaev.
Oblys basshysynyń pikirinshe, VII qysqy Azıada oıyndary ótetin eldi anyqtaý barysynda Nursultan Nazarbaevtyń halyqaralyq bedeli, elimizdegi turaqtylyq pen tynyshtyq, sondaı-aq álemdik arenadalarda Qazaqstannyń abyroıyn qorǵap júrgen qazaqstandyq sportshylardyń jetistikteri aıryqsha rol atqardy.
«Qazaqstannyń barlyq qalalary arqyly alyp ótiletin Azıada Alaýy bizdiń sportshylarymyzdy jańa rekordtarǵa yntalandyrady degen úmittemiz jáne biz oǵan senemiz», - dedi oblys ákimi Q.Bozymbaev alaýdy qabyldap turyp.
Jambyl jerinde Alaý estafetasyn birinshi bolyp bastaǵan ákim, alǵashqy 200 metrdi júgirip ótti. Taraz estafetasyna barlyǵy 60 alaýger - sportshylar, sport ardagerleri, mádenıet qaıratkerleri qatysýda.
Taraz kóshelerimen júrip ótken Alaý estafetasy «Dostyq» ortalyq alańynda aıaqtaldy. Odan keıin qazaqstandyq juldyzdardyń qatysýymen gala-kontsert bastaldy.
Azıada alaýy búgin keshke Ońtústik Qazaqstan oblysynyń ókilderine tabys etiledi.
