Azıada olımpıadasyna qansha kún qalǵanyn keri esepteıtin tablonyń ashylý saltanaty naýryz aıyna aýystyryldy
ASTANA. Qańtardyń 26-sy. QazAqparat - Qańtardyń 30-ynda VII qysqy Azıada oıyndarynyń ashylýyna týra 365 kún qalatynyna qaramastan, Azııa Olımpıada keńesiniń usynysymen oǵan qansha kún qalǵanyn keri esepteıtin tablonyń ashylý saltanaty 2010 jylǵy naýryz aıyna aýystyryldy,
dep habarlady búgin QR Týrızm jáne sport mınıstrliginiń baspasóz qyzmeti.
Aqpan yńǵaısyz aı bolyp otyr, óıtkeni bul kezde Ulttyq olımpıada komıtetiniń músheleri, atletter, jattyqtyrýshylar, sport qoǵamdastyǵy Vankýverdegi Olımpıada oıyndaryna daıyndalý jáne qatysý ústinde bolady. Budan basqa, Azııa Olımpıadalyq keńesiniń músheleri - Astana men Almatyda ótetin saltanattyń qurmetti qonaqtary da Kanadadaǵy Oıyndardyń uıymdastyrý jumystarynda júredi.
Esterińizge sala keteıik, olımpıada dástúrleri boıynsha sharaǵa týra bir jyl qalǵanda oǵan qansha kún qalǵanyn keri esepteıtin tablo ashylady. Ol iri sport forýmdarynyń basty atrıbýttarynyń biri.
Bıylǵy jyly tablonyń ashylýy qatysýshy-elder aldynda Azıada-2011 uıymdastyrý komıtetiniń Oıyndarǵa ázirligi týraly esebi tyńdalatyn semınarǵa oraılastyrylyp otyr.
Keri esepteý tablosy eki qalada bir mezgilde ornatylady. Ony saltanatty ashýdyń baǵdarlamasy qazirdiń ózinde daıyn boldy. Astanada ol «Astana-Arena» jańa fýtbol stadıonynyń qasynda, al Almatyda - Abaı jáne Baıtursynov dańǵyldarynyń qıylysynda, Balýan Sholaq atyndaǵy Sport saraıy aldynda ornatylady.
