AZIADA: Mánerlep syrǵanaýdan áıelder arasyndaǵy qysqa baǵdarlamada japondyq sportshylar úzdik óner kórsetti
ASTANA. 4 aqpan. QazAqparat /Gúlmıra Álıakparova/ - Astanadaǵy Respýblıkalyq velotrekte Aq Azıada oıyndary aıasynda ótken mánerlep syrǵanaýdan áıelder arasyndaǵy qysqa baǵdarlama aıaqtaldy.
Birinshi jarys kúniniń nátıjesi boıynsha, týrnırlik kesteniń joǵarǵy ornyna tóreshilerdiń bergen 54,48 upaıymen (27,72 upaı - tehnıkasy úshin, 26,76 upaı - sheberligi úshin) japondyq Mýrakamı Kanako (MURAKAMI Kanako ) ornalasty. Ekinshi orynǵa 54,02 upaımen onyń otandasy Imaı Harýka (IMAI Haruka ) , úshinshi orynǵa 52,65 upaımen ońtústik koreıalyq Kvak Mın Jeon (KWAK Min-Jeong ) ornalasty.
Bul jarysta el namysyn qorǵaǵan Krıstına Prılepke tehnıkasy úshin - 17,92 jáne sheberligi úshin - 18,31, barlyǵy - 36,23 upaı jınap onynshy orynnan kórindi. Ekinshi otandasymyz Marına Shıshkına kúrdeli elementti jasaý barysynda ókinishke qaraı, muz aıdynynda qulap qalyp, jalpy upaı sanynan 1,00 ball joǵaltyp aldy. M.Shıshkına 25,61 upaımen týrnırlik kestede 15 orynda tur.
Mánerlep syrǵanaýdan áıelder arasyndaǵy Azıada jeńimpazdary erteń, 5 aqpan kúni anyqtalatyn bolady. Sportshylar erkin baǵdarlamada óner kórsetedi.
