AZIADA: Qyrǵyzstannyń qurama komandasy shaıbaly hokkeıde birinshi oryn alýy múmkin
ASTANA. 1 aqpan. QazAqparat /Arman Asqarov/ - Búgin Astanadaǵy «Barys» sport kesheninde 7-Qysqy Azııa oıyndary aıasynda ótip jatqan shaıbaly hokkeıden erler komandalary arasyndaǵy premer-dıvızıon jarystarynyń kezekti oıynynda Qyrǵyzstannyń quramasy Malaızııany jeńdi.
Esep - 23:2. Osymen Qyrǵyzstan quramasy Taıland, Birikken Arab Ámirlikteri, Mońǵolııa men Malaızııany artqa tastap, tórtinshi ret jeńiske jetip otyr. Sport sarapshylarynyń aıtýynsha, premer-dıvızıon sanatynda birde-bir jeńilmeı kele jatqan qyrǵyzstandyq hokkeıshiler birinshi oryndy alýy ábden múmkin. Aldaǵy ýaqytta olar Bahreın men Kýáıt komandalarymen kezdespek. Atalǵan eki komanda buǵan deıingi kezdesýlerdiń bárinde de utylǵan bolatyn.
Premer-dıvızıonda 2-3-oryndar úshin Taıland, Malaızııa, Mońǵolııa jáne Birikken Arab Ámirlikteri talasady.
