Azıada qurmetine arnalǵan fanfarlar - Almatydaǵy kontsertter
ALMATY. 26 qańtar. QazAqparat /Názıra Eleýhan/ - Almatyda 7-qysqy Azııa oıyndary aıasynda ótetin «Mádenı Azıada» baǵdarlamasy qyzyqqa toly bolmaq. Arnaıy festıvalge daıyndalǵan baǵdarlamalar qala ákimdiginiń uıymdastyrýmen 28 qańtardan 7 aqpanǵa deıin ótedi.
Aktsııaǵa barlyq eń jaqsy degen sahna alańdary men mádenı oshaqtar tartylǵan. Máselen, bıyl 75 jyl tolǵan Jambyl atyndaǵy Qazaq memlekettik fılarmonııasynda N.Tilendıev atyndaǵy memlekettik akademııalyq folklorlyq-etnografııalyq «Otyrar sazy» orkestriniń «Uly dalanyń áýenderi» atty kontserti, B.Baıqadamov atyndaǵy memlekettik hor kapellasynyń «Eýrazııa júreginde» atty kontserti ótedi. Sonymen qatar qala ákimdiginiń estradalyq-sımfonııalyq orkestriniń, QR Memlekettik akademııalyq sımfonııalyq orkestriniń, Memlekettik úrlemeli orkestriniń «Azıada qurmetine fanfarlar» atty kontserti, sondaı-aq, «Dos-Muqasan» tobynyń jáne Azııa juldyzdarynyń kontserti bolmaq.
«Qazaqkontsert» zalynda orys kompozıtorlarynyń shyǵaramalarynan quralǵan klassıkalyq mýzyka áýenderin oryndaıtyn «Qazaqstan Kameratasy» ansambliniń kontserti, sonymen qatar, elimizdiń tanymal oryndaýshylarynyń qatysýymen «Azıadaǵa-Qazaqkontsertten» atty mýzykalyq kesh ótedi.
Ónersúıer qaýymdy qazaqstandyq teatrlar birshama qoıylymdarymen qýantpaq. M.Áýezov atyndaǵy Qazaq memlekettik akademııalyq teatrynda Azıadanyń qonaqtary men qatysýshylary «Tomırıs» dramasyn tamashalaı alady. Al, M.Lermontov atyndaǵy Memlekettik akademııalyq orys teatrynda N.Ptýshkınniń «Ol ólgeli jatqanda», V.Eremınniń «Tasqyn kezde jyndyhanadaǵy órt» atty qoıylymdary men A.Chehovtyń «Shıeli baq» atty premerasyn kóre alady. Respýblıkalyq nemis drama teatry Ý.Saroıannyń «Ashyqqandar. Áı, qaısyń barsyń!» pesasyn, al koreılik mýzykalyq komedııa teatry «Aýyldyq kadrıl» atty janrlyq qoıylymdy qoıatyn bolady.
Al Abaı atyndaǵy Qazaq memlekettik akademııalyq opera jáne balet teatry D.Shostakovıchtiń «Charlı», A.Shnıtkeniń «Sıýıta», A.Rybnıkovanyń «ıÝnona» jáne «Avos» baletin, jáne Dj.Verdıdiń «Travıata», Dj.Pýchchınıdiń «Týrandot» operalaryn qoıatyn bolady. Dál osy teatrda Azıadanyń jabylýy qarsańynda elimizdiń óner sheberleriniń qatysýymen gala-kontsert bolady.
