AZIADA: Qazaqstannyń quramasy Koreıany ázirge 3:0 esebimen utýda
ASTANA. 4 aqpan. QazAqparat /Arman Asqarov/ - Dál qazir Astanadaǵy «Qazaqstan» sport saraıynda 7-Qysqy Azııa oıyndary aıasyndaǵy shaıbaly hokkeıden joǵary dıvızıon sanatynda Qazaqstan men Koreıa quramalary kezdesýde.
Oıynnyń birinshi kezeńi aıaqtaldy. Onyń nátıjesi boıynsha qazaqstandyq hokkeıshiler óz qarsylastaryn 3:0 esebimen utty. Oıynnyń 3 mınýtynda komandamyzdyń sol jaq shabýylshysy Evgenıı Rymarev Koreıanyń qaqpasyna birinshi shaıbany saldy. Odan keıin esepti kapıtan Talǵat Jaılaýov eselep, qarsylastardyń qaqpasyna ekinshi shaıbany kirgizdi. Úshinshi shaıba shabýylshy Evgenıı Rymarevtiń enshisinde. Qazaqstan quramasynyń qaqpasyn Vıtalıı Kolesnık qorǵaýda.
Aıta keteıik, Qazaqstannyń búgingi qarsylasy Koreıa hokkeıshiler quramasy buǵan deıin Qytaılyq Taıpeı komandasyn 22:0 esebimen jeńip, Japonııadan 1:6 esebimen utylǵan edi. Bizdiń komandamyz bolsa, Qytaı men Qytaılyq Taıpeı quramalarymen ótkizgen oıyndarda aıqyn basymdyqpen jeńiske jetken bolatyn.
