Azıada: Qazaqstannyń hokkeıshilerin kapıtan Talǵat Jaılaýov bastap shyǵarady
ASTANA. 1 aqpan. QazAqparat /Arman Asqarov/ - 7-Qysqy Azııa oıyndary aıasynda búgin Astanada ótip jatqan shaıbaly hokkeıden erler komandalary arasyndaǵy joǵarǵy dıvızıon jarystarynda Qazaqstan quramasy óziniń alǵashqy oıynyn Qytaı quramasymen ótkizedi.
"Bizdiń komandany aıdynǵa kapıtan Talǵat Jaılaýov bastap shyǵaratyn bolady. Biz oǵan úlken úmit artyp otyrmyz», - dedi búgin Qazaqstan quramasynyń bas bapkeri Andreı Homýtov QazAqparat tilshisine bergen suhbatynda.
Onyń habarlaýynsha, qazaqstandyq hokkeıshiler úsh bestikte oınaıtyn bolady. «Qazirgi kezde Novokýznetsk qalasynan Dmıtrıı Dýdarev jáne Alekseı Koledaevtar keldi. Aldaǵy ýaqytta bizge Qurlyqtyq hokkeı lıgasynda oınap júrgen taǵy 6 sportshy qosylýy kerek. Búgingi tańda «Barys» komandasynyń quramynda óner kórsetip júrgen keıbir hokkeıshilerdiń Qazaqstan azamattyǵy bolmaǵandyqtan, olar Azıada aıasyndaǵy jarystarǵa qatysa almaıdy. Oǵan qaramastan, Qazaqstannyń qurama komandasyndaǵy 23 oıynshynyń 3-ýi qaqpashy bolsa, 6-ýy basqa komandalardan shaqyrylyp otyr. Al qalǵan hokkeıshilerdiń bári - «Barystyń» tarlandary», - deıdi A.Homýtov.
Búgingi oıynda bizdiń qurama 16 hokkeıshi men 2 qaqpashynyń quramynda tirkelip otyr. «Bizdiń komandany kapıtan Talǵat Jaılaýov bastap shyǵaratyn bolady. Ol oń jaq shabýylshysy bolmaq. Onyń jetekshiliginde Andreı Gavrılın, Vadık Krasloslobodtsev syndy sportshylar óner kórsetpek. Biz Talǵatqa úlken úmit artyp otyrmyz», - dep atap kórsetti A.Homýtov.
Osy oraıda keshegi Qytaı-Japonııa matchyna baǵa bergen A.Homýtov: «Oıyn óte qyzyqty ótti. Árıne, japondyqtar ushqyrlyq jaǵynan sheber oınap, qarsylastyń jibergen qatelikterin paıdalana biledi. Menińshe, bizdiń basty qarsylasymyz - Japonııa men Koreıa bolmaq. Biraq, árıne, biz árbir oıynǵa daıyn bolýymyz qajet», - deıdi Qazaqstan quramasynyń bas bapkeri.
