AZIADA: Qazaqstandyq taý shańǵyshy L. Fedotova Azıada chempıony, enshimizde 21 altyn
ALMATY. 4 aqpan. QazAqparat /Erlik Erjanuly/ - 7-Qysqy Azııa oıyndary aıasynda jerlesimiz Lıýdmıla Fedotova taý shańǵysy sportynan áıelder arasyndaǵy sýperkombınatsııa jarysynda jeńimpaz atandy. Osylaısha Qazaqstan quramasynyń qorjynyna 21-altyn medal tústi.
Ushyna jalaýshalar baılanǵan jerge qadalǵan shybyqtardyń arasynan óte otyryp tómen qaraı quldılaýdyń eki kezeńi boıynsha Lıýdmıla Fedotova 2 mınýt 1,41 sekýnd ýaqyt kórsetkishimen chempıon atandy. Atap óterligi, sýperkombınatsııanyń birinshi túri - sýpergıgant slalomynyń nátıjesi boıynsha otandasymyz 7-Qysqy Azııa oıyndarynyń eki dúrkin jeńimpazy ońtústikkoreıalyq sportshy Kım Sýn Djýǵa (Kim Sun Joo) 0,36 sekýndqa utylyp turǵan bolatyn. Alaıda ekinshi jattyǵý kezinde Kım Sýn Djý qashyqtyqtyń sońǵy metrlerinde qulap qalyp, altynnan úmitin úzdi. Nátıjesinde ol altynshy oryndy mise tutty. Bul jarysta kúmis júldeni Fedotovadan 2,23 sekýndqa qalyp qoıǵan ekinshi bir ońtústikkoreıalyq sportshy Djon Sora (Jeong Sora) jeńip aldy. Qola júlde bizdiń jerlesimiz Ksenııa Stroılovaǵa buıyrdy. Ol chempıonnan 2,86 sekýndqa qalyp qoıdy.
