Azıada: Qazaqstandyq eskek esýshiler jattyǵýdy bastady
ASTANA. QazAqparat - Akademııalyq esýden komanda músheleri 14 tamyz kúni sporttyq qurylǵylaryna qol jetkizip, sýdaǵy jattyǵý jumystaryn bastap ketti, dep habarlaıdy Olympic.kz.
Eskek esýshiler alǵashqylardyń biri bolyp Azııa oıyndaryna qatysý úshin Indonezııaǵa attanǵan edi. Akademııalyq esýshiler Palembangtaǵy atletıkalyq aýylǵa ornalasty. Kóp uzamaı, baıdarka men kanoede esýshiler de keledi.
Akademııalyq esýden komanda múshesi Evgenıı Vasılev munda barlyq jaǵdaıdyń jasalǵanyn aıtty. Tek aýa raıynda ǵana azdaǵan qıyndyqtar bar.
«Atletıkalyq aýylda barlyq jaǵdaı jasalǵan. Jatatyn oryn, bólmeler men as ishetin jer de tamasha! Jattyǵý óz retimen júrip jatyr. Keshe qaıyq pen eskekterimizge qol jetti. Sýdaǵy jattyǵýǵa tolyǵymen kóshti. 95 paıyzǵa daıynbyz dep aıta alamyn. Jergilikti klımatqa beıimdelip, aǵzany ystyq aýaǵa úıretip alsaq, barlyǵyna daıyn bolamyz», - deıdi Evgenıı.
Sportshynyń aıtýynsha, Qazaqstan quramasy tolyǵymen kelmegendikten, komanda korpýsynda bos oryndar jeterlik.
«Barlyǵy da keremet. Atletıkalyq aýyldaǵy atmosfera da jaman emes. Tek aýa raıy azdap qınap tur. 80 paıyz ylǵaldylyq pen +33 gradýs ystyqty ózińiz elestete berińiz. Sol sebepti, jattyǵý arasynda kondıtsıonerge qaraı júgiremiz», - deıdi Vasılev.
Eske sala keteıik, Azııa oıyndary 18 tamyz kúni bastalady. Jarysty Indonezııanyń eki qalasy - Djakarta men Palembang qabyldaıdy.
