AZIADA: Qazaqstandyq bıatlonshy E. Hrýstaleva Azıada chempıony, enshimizde 20 altyn medal bar
ATY. 4 aqpan. QazAqparat /Erlik Erjanuly/ - Qazaqstandyq bıatlonshy Elena Hrýstaleva qyzdar arasyndaǵy 15 shaqyrymdyq jekeleı synda Aq Azıadanyń chempıony atandy. Osylaısha Qazaqstan quramasynyń qorjynyna 7-Qysqy Azııa oıyndarynyń 20-altyn júldesi tústi.
Almaty oblysyndaǵy Soldat shatqalyndaǵy Shańǵy-bıatlon stadıonynda ótken jarys barysynda Elena Hrýstaleva nysanany eki márte dál kózdeı almady. Birinshi atys alańynda jáne ekinshi atys alańynda atqan oqtary bir-bir retten zaıa ketti. Alaıda soǵan qaramastan, úshinshi atys alańynan keıin japonııalyq bıatlonshy Sýdzýkı Fýıýkony (Suzuki Fuyuko) 6,7 sekýndqa utyp, aralyq kóshbasshy atandy. Óziniń negizgi qarsylastary nysanany bir-bir márte durys kózdeı almaǵandyqtan, Elena Hrýstaleva tórtinshi atys alańynan keıin olardan bir mınýttan astam ýaqytqa ozyp ketti. Osylaısha ol márege birinshi bolyp kelip, Azııa oıyndarynyń chempıony atandy. Onyń ýaqyt kórsetkishi - 53 mınýt 16,8 sekýnd.Kúmis medaldi japonııalyq Sýdzýkı Fýıýko ıelendi. Ol chempıonnan 1 mınýt 14,9 sekýndqa qalyp qoıdy. Qola júldeni taǵy bir qazaqstandyq Marına Lebedeva jeńip aldy. Ol japondyq sportshydan 4,6 sekýndqa qalyp qoıdy. Jerlesimiz jarys barysynda nysanaǵa úsh ret dál tıgize almady.
Aıta keteıik, bul Elena Hrýstaleva men Marına Lebedovanyń 7-Qysqy Azııa oıyndaryndaǵy ekinshi júldeleri. 31 qańtar kúni ótken 7,5 shaqyrymdyqtyq jarysta Elena Hrýstaleva kúmis júldeger atansa, Marına Lebedova qola medaldi qanjyǵasyna baılaǵan bolatyn. Ol synda altyn medaldi qytaılyq bıatlonshy Van Chýnlı jeńip aldy.
Vankýver olımpıadasynyń kúmis júldegeri atanǵan Elena Hrýstalevadan qazaqstandyq jankúıerler bul Aq Azıada tek altyn júldeler kútken bolatyn. 7,5 shaqyrymdyqtyq birinshi jarysta ol kúmis júlde alyp qalǵanda, úmit pen kúdik arpalysqandaı bolyp edi. Sol kúngi jarystan keıin bolǵan baspasóz máslıhatynda
QR Bıatlon quramasynyń bas jattyqtyrýshysy Aleksandr Tkachýk osy júldege qatysty oıyn bylaı bildirgen bolatyn: «Búgingi jarystaǵy qytaılyq sportshynyń jeńisi kezdeısoq emes. Ol oǵan ábden laıyq. Elena Hrýstaleva 15 shaqyrymda myqty. Ol osy qashyqtyqta Vankýver Olımpıadasynda kúmis júldeger atandy. Sondyqtan onyń altyn medali áli alda». Aıtsa aıtqandaı-aq, bas jattyqtyrýshynyń sózi aına qatesiz keldi.
