Azıada: Qazaqstandyq dzıýdoshylar taǵy eki medal aldy

Qytaıdyń Hanchjoý qalasynda ótip jatqan XIX jazǵy Azııa oıyndarynda el quramasy qorjynyna taǵy eki júlde tústi, dep habarlaıdy QazAqparat tilshisi.

Dzıýdoshy Abylaıhan Jubanazar 81 keli salmaqta 3-oryn úshin ózbekstandyq Mýso Sobırovpen sheberlik baıqasty.

Qazaqstandyq sportshy qarsylasyn ıppon ádisimen jeńip ketti. Nátıjesinde dúbirli dodada qola júldege qol sozdy.

Abylaıhan irikteý satysynda Gonkong jáne Bahreınnen kelgen qarsylastaryn qapy qaldyrdy.

Jartylaı fınalda tájikstandyq Somon Mahmadbekovke ese jiberip qoıdy.

Sondaı-aq, dzıýdodan Esmıgúl Kýıýlova (63 keli) taǵy bir qolaǵa ıe boldy. Ol 3-oryn úshin saıysta japonııalyq Kıemı Vatanabeni jeńdi.

Eske salsaq, budan buryn dzıýdodan Abıba Ábýjaqynova ekinshi oryn alsa, úshinshi orynǵa Maǵjan Shamshadın, oq atýdan Nıkıta Chırıýkın qol jetkizdi.