AZIADA: Qazaqstanda jınaqtalǵan tájirıbeni óz elimizde damytatyn bolamyz – Shaıbaly hokkeıden Taıpeı quramasynyń jattyqtyrýshysy
ASTANA. 4 aqpan. QazAqparat /Arman Asqarov/ - 7-Qysqy Azııa oıyndary aıasynda Qazaqstanda jınaqtalǵan tájirıbeni biz óz elimizde damytatyn bolamyz.
Keshe, 3 aqpanda shaıbaly hokkeıden top dıvızıonda óner kórsetetin Qazaqstan men Qytaılyq Taıpeı quramalarynyń kezdesýinen keıin ótken baspasóz máslıhatynda Qytaılyq Taıpeı quramasynyń bas jattyqtyrýshysy Tsaı Mıng Tsang osyndaı pikir bildirdi.
Aıta keteıik, ol oıynda 35:0 esebimen bizdiń komanda jeńiske jetken bolatyn. Sonymen qatar Qytaılyq Taıpeı onyń aldyndaǵy kezdesýlerinde Japonııadan 0:18, al Ońtústik Koreıadan 0:22 esebimen utylǵan bolatyn.
Baspasóz máslıhatynda Tsaı Mıng Tsang Qytaılyq Taıpeı quramasynyń top dıvızıonda oınaýyn Taıvan eliniń Olımpıada komıteti talap etkenin aıta kele: «Bastapqyda biz premer-dıvızıonda oınaýdy
jón kórgen edik. Biraq Taıvannyń Olımpıada komıteti 7-Qysqy Azııa oıyndarynda shaıbaly hokkeıden joǵary dıvızıonda óner kórsetýdi uıǵardy. Biz bul sheshim úshin ókinbeımiz. Sebebi bizdiń hokkeıshiler 7-Qysqy Azııa oıyndary barysynda mol tájirıbe jınaqtady. Biz bul tájirıbeni ári qaraı damytatyn bolamyz. Bizdiń negizgi oıymyz - elimizde shaıbaly hokkeıdi damytý. Qazaqstandaǵy Azıada ol úshin qajetti múmkindikti týǵyzyp otyr. Árıne, eń aldymen, biz osyndaı oıyndy ótkizýge múmkindik bergen Qazaqstanǵa alǵysymyzdy aıtamyz», - dedi.
