Azıada Qazaqstan úshin sportty damytýdaǵy jańa kezeńniń basy bolmaq – N. Knıazev

Olar úshin bul dúbirli doda keleshektegi Olımpıada oıyndaryna daıyndyqtyń bir satysy bolmaq. Biz osyǵan oraı «Dınamo» deneshynyqtyrý jáne sport qoǵamy» qoǵamdyq birlestigi Sport basqarmasynyń bastyǵy Nıkolaı Knıazevti suhbatqa tartqan edik.

- Nıkolaı Dmıtrıevıch, 2010 jyly Gýanchjoýda ótken jazǵy Azııa oıyndaryn óz kózińizben tamashalap qaıttyńyzdy bilemiz. Endi Almaty men Astanadaǵy qysqy Azııa oıyndarynan qandaı nátıje kútesiz?

- El men eldi, ult pen ulysty ózara jaqyndastyrýǵa sporttyń qosar úlesi óte zor. Memlekettiń mereıin ósirip, onyń álemge tanymaldyǵyn arttyrýda sportqa jetetin birde-bir sala joq. Sondyqtan barlyq el óziniń shama-sharqyna qaraı otandyq sportyn damytýǵa aıryqsha kóńil bólip jatyr. Bul úrdisten Azııadaǵy 45 memleket te qur alaqan qalyp otyrǵan joq. Sonyń nátıjesinde Azııa oıyndarynyń da deńgeıi jyldan-jylǵa ósip kele jatyr. Ony respýblıkalyq telearnalar arqyly qazir kún saıyn kórsetilip jatqan qysqy Azııa oıyndarynan da aıqyn ańǵarýǵa bolady. Bul shara elimizde sońǵy jyldary kenjelep qalǵan qysqy sport túrleriniń qaıta jandanýyna tyń serpin beretini kúmánsiz. Máselen, Azııa oıyndary qarsańynda Qazaqstanda buryn-sońdy bolmaǵan birqatar jańa sport nysandary salyndy. Ol respýblıkada sport salasynyń damýyndaǵy jańa kezeńniń bastalýyna túrtki boldy. Bul barlyq sportshylar úshin úlken syılyq bolyp otyr. Endi olar keıbir sport túrleri boıynsha óz sheberligin jetildirý kezinde shetelge baryp áýre bolmaıdy. Degenmen bizdiń sportshylarymyz óz múmkindigin tolyq kórsetýi úshin áli de bir olımpıadalyq tsıkldi kútýi qajet. Sondyqtan qazirgi kezdegi eń negizgi másele osy qarqyndy baıaýlatyp almaýda bolyp tur. Óıtkeni KSRO taraǵan soń elimizdegi "Medeý" muz aıdyny sııaqty nysandar óz maqsatyna paıdalanylmaı qaldy. Sol sebepti konkımen júgirýden Qazaqstan chempıonatyn 3 jyl qatarynan kórshiles Reseıdiń Chelıabınsk qalasynda ótkizýge májbúr boldyq.

- Olımpıadalyq tsıklge ilesý úshin qandaı naqty sharalardy júzege asyrýymyz qajet?

-Buryn elimizde sporttyń san túri boıynsha arnaıy klastar men mektep-ınternattar ashylǵan bolatyn. Olardyń keńestik dáýirde qalyptasqan materıaldyq tehnıkalyq-bazasy ókinishke qaraı, toqsannyshy jyldardyń ishindegi toqyraý kezinde jáne basqa da sebepterdiń nátıjesinde azyp-tozyp, bilikti mamandar tirshilik qamymen jan-jaqqa shashylyp ketti. Olardyń arasynda óz qyzmetin shetelderde jalǵastyryp júrgender az emes. Mysaly, Olımpıada oıyndarynyń 2 dúrkin jeńimpazy V.Vohmıanın Kýveıtte júr. Al nysana kózdeýde elimiz qazir bapkerlerge óte zárý bolyp otyr. Sondyqtan birqatar sport túrlerinen keminde 2 tsıkl sheteldik mamandardyń kómegine júginýdi men qoldaımyn. Mundaı tájirıbe búkil álemde bar. Qazir Týrızm jáne sport mınıstrligi osy baǵytta jumys jasaýda. Árıne, materıaldyq bazany qalpyna keltirý jáne onda jumys jasaıtyn jańa mamandardy daıyndaý ońaı sharýa emes. Degenmen mamandandyrylǵan sport mektepteriniń ashylyp, olımpıadalyq rezervterdi daıyndaý úshin balalar men jasóspirimder sportyn órkendetýge erekshe kóńil qoıylyp jatqany kóńilge medeý bolýda.

- Sheteldik bapker degende qazir sport jankúıerleriniń aýzyna eń aldymen fýtbol túseri kúmánsiz. Ókinishke qaraı, sheteldik bapkerlerdiń kópshiligine jankúıerlerdiń ǵana emes, sport mamandarynyń da kóńili tolmaı júr ǵoı? Bul týraly Sizdiń paıymyńyz?

- Fýtbol qazir halyqtyq sport túri ǵoı. Shetelden bapker aldyrsaq bári birden ózgerip sala beredi deýge bolmaıdy. Nátıjege birtindep qol jetkizetin bolamyz. Ózimizdiń fýtbol mektebimiz ázirge álsizdeý bolyp tur. Fýtbol jankúıerleriniń biri retinde meniń de kóp nársege kóńilim tolmaıdy. Degnmen Qazaqstan fýtbol federatsııasynyń bul tyǵyryqtan shyǵaratyn jol izdep jatqanyn jaqsy bilem. Bolashaqtan úmitim óte zor.

- Qysqy Azııa oıyndaryna jasaǵan boljamdaryńyz qanshalyqty oryndalýda?

- «Dınamo» deneshynyqtyrý jáne sport qoǵamynan bul baıraqty básekege jalpy sporttyń 9 túri boıynsha 45 sportshy qatysýda. Olar uzyn-sany 25-27 medal alýdy josparlap otyr. Qazirgi tańda shańǵy jarysynda - Alekseı Poltaranın, konkımen júgirýde - Dmıtrıı Babenko, frıstaıldan - Dmıtrıı Reıherd, ıÝlııa Galysheva, Dmıtrıı Bormashov, bıatlonda - Aleksandr Chervıakov, Elena Hrýstaleva, taý shańǵysynda - Igor Zakýrdaev syndy sportshylarymyz Qazaqstan quramasynyń qorjynyna altyn, kúmis jánpe qola medaldar salýda. Dınamoshylar sondaı-aq, komandalyq jarystarda da óz sheberlikterin pash ete aldy. Alda áli de sarapqa salynbaǵan 15-ten astam medaldar toptamasy bar. Sondyqtan ulttyq quramanyń komandalyq esepte 1- oryn alý týraly josparyna dınamoshylardyń qosar úlesi qomaqty bolary kúmánsiz.

- Áńgimeńizge rahmet