Azıada qarsańynda respýblıkalyq mańyzy bar joldarda kóliktiń qaýipsiz qozǵalysyn qamtamasyz etý sharalary atqarylyp jatyr - «Qazaqavtojol» RMK
ASTANA. 25 qańtar. QazAqparat - Azıadaǵa qatysýshylar men qonaqtardyń respýblıkalyq mańyzy bar joldardaǵy qaýipsiz qozǵalysyn qamtamasyz etý sharalary atqarylyp jatyr. Bul jaıynda búgin «Qazaqavtojol» RMK-nyń baspasóz qyzmeti habarlady.
«Búginde «Qazaqavtojol» RMK tarapynan qysqy Azııa oıyndarynyń qatysýshylary men qonaqtarynyń respýblıkalyq mańyzy bar avtojoldarda toqtaýsyz ári qaýipsiz kólik qozǵalysynyń qamyn iske asyrý jumystary atqarylyp jatyr. Kásiporyn qysqy maýsym aralyǵynda qardy tazalaý men qarǵa qarsy yqtyrma qorshaýlaryn jasap, kóktaıǵaqqa qarsy materıaldardy paıdalaný, sondaı-aq joldardyń boıynda jylý beketterin daıyndaý sekildi jumystardy josparly túrde júrgizdi», - delingen taratylǵan málimetterde.
Osy oraıda oblys fılıaldaryndaǵy arnaıy tehnıkalar tolyq jasaqtalyp, joldardaǵy ahýaldy baqylaý úshin úzdiksiz kezekshilik qamtamasyz etildi.
Qysqy Azııa oıyndary kezinde respýblıkalyq mańyzy bar avtojoldardyń oblystar boıynsha ornalasqan josparly baǵyttary aıqyndaldy. Atap aıtqanda Almaty oblysy boıynsha «Almaty-Qorǵas» jolynyń 9-35 shaqyrymy, «Almaty-Talǵar-Evgenevka» avtojolynyń 8-25 shaqyrymy jáne «Almataý týrbazasynyń kireberisi» 0-15 shaqyrymy, Aqmola oblysynda «Astana qalasy aınalma jolynyń» 0-53 shaqyrymy, «Astana-Şýchınskiniń» 17-241 shaqyrymy, sondaı-aq «Reseı shekarasy (Ekaterınbor baǵytynda)-Almaty qalasy» 1278-2214 shaqyrymdaryndaǵy joldarda kólikterdiń qozǵalysyn toqtaýsyz qamtamsyz etý jumystary iske asyrylyp jatyr. Munymen qosa, ózge de óńirlerdegi respýblıkalyq joldarda osyndaı sharalar atqarylýda. Osy oraıda «Qazaqavtojol» RMK-nyń Almaty oblystyq fılıalynan 24 birlik tehnıka, Aqmola oblystyq fılıalynan 63, Qaraǵandy oblystyq fılıalynan 40, sonymen qatar Jambyl oblystyq fılıalynan 12 birlik, al «Qazaqavtojol-Kókshetaý» enshiles memlekettik kásipornynan 26 arnaıy tehnıka jumyldyrylmaq.
