Azıada qarsańynda Oraldaǵy orta mektepte sport zaly ashyldy
ORAL. 26 qańtar. QazAqparat /Eljan Eraly/ - 7-Qysqy Azııa oıyndary qarsańynda Oral qalasyndaǵy №43 orta mektebinde sport zaly ashyldy.
Otaý tikkenine on jyl tolǵan qazaq mektebinde buǵan deıin sport zaly bolmaǵanmen, shákirtteri talaı jarysta ozyp shyqqan eken. Onynshy synypta oqıtyn, bokstan kadetter arasynda 2009 jylǵy el birinshiliginiń qola júldegeri Aıbek Tólegenovtiń sózine qaraǵanda, ol bapkeri Sattar Sultanǵalıevtiń jetekshiligimen jeti jyldan beri boksqa beıimdelgen orynda aınalysyp kelgen. Aıbek búginde belgili sportshylarǵa aınalǵan Berik Shynarov, bokstan ótken jylǵy Azııa oıyndarynyń chempıony Danııar Eleýsinovpen birge jattyqqanyn maqtan etedi. Ózi sekildi qurdastary Tahır Mustafın, Áskerbek Ótepbergenov, Telman Begalıevter de qazirgi tańda kadetter arasynda respýblıkalyq týrnırlerdiń júldegeri atanyp úlgerdi.
Endi oqýshylardyń sportpen jappaı aınalysýyna múmkindik týyp otyr. Atalmysh sport zaly qurylysyna qalalyq bıýdjetten 47 mln. teńge bólinip, «Oralqurylysınvest» JShS úsh aıdyń ishinde mektepke japsarlas ǵımaratty salyp shyqty. Onyń bólek esigi, qosymsha bólmeleri de bar.
