Azıada qarsańynda elimizdegi avtojoldardy daıyndaý boıynsha tyńǵylyqty jumystar atqarylyp jatyr-«Qazaqavtojol» RMK

Bul týraly Kólik jáne kommýnıkatsııa mınıstrliginiń alqa májilisinde «Qazaqavtojol» RMK-nyń bas dırektory Mereke Pishembaev málim etti.

«Búginde Astana jáne Almaty qalalarynda ótkiziletin qysqy Azııa oıyndary qarsańynda avtojoldardy daıyndaý boıynsha jumystar júrgizilip jatyr. Respýblıkalyq memlekettik kásiporynnyń buıryǵymen arnaıy Іs-sharalar jospary bekitildi»,-dedi bas dırektor.

Onyń sózine qaraǵanda, Almaty oblysynda atalǵan sporttyq shara kezinde qamtylatyn jol telimderine tıisti kólemde arnaıy tehnıka jumyldyrylmaq. «Sondaı-aq «Astana-Almaty» jáne «Astana qalasy aınalma joly» avtojoldary erekshe baqylaýǵa alyndy. Osy oraıda Azıada kezinde qyzmet kórsetetin respýblıkalyq mańyzy bar avtojoldarda jol tehnıkasyn ornalastyrý kestesi ázirlendi»,-dedi M. Pishembaev.

Atalǵan mekeme basshysynyń aıtýynsha, Azıada kezinde Ońtústik Qazaqstan, Jambyl jáne Qaraǵandy oblystaryndaǵy fılıaldardan qosymsha tehnıka tartý josparlanyp otyr. Atap aıtqanda, joldyń problemalyq ýchaskelerinde tóseletin kóktaıǵaqqa qarsy arnaıy materıaldar da qajetti kólemde daıyndaldy.

Aıta keteıik, bul kásiporyn elimizdegi 23,5 myń shaqyrym respýblıkalyq mańyzy bar joldarda qyzmet kórsetedi. «Qazaqavtojol» RMK-nyń quramynda oblystyq 14 fılıal jáne «Qazaqavtojol-Kókshetaý» enshiles memlekettik kásiporny bar. Avtokólik joldarynda qyzmet kórsetý baǵytynda osy kásiporynda 3,5 myń adam jumys isteıdi. Jyldyń qys merziminde mekeme qyzmetkerleri joldy qardan tazalaý jumysymen aınalysady.