Azıada: Hokkeıden Qazaqstannyń áıelder quramasy Japonııany jeńdi
ALMATY. 1 aqpan. QazAqparat /Erbol Turymbetov/ - 7-Qysqy Azııa oıyndary aıasynda keshe Shaıbaly hokkeıden Qazaqstannyń áıelder quramasy basty qarsylastary - Japonııany match sońyndaǵy býllıtten utty.
Almatydaǵy Balýan Sholaq atyndaǵy sport saraıynda ótken oıynda matchtyń birinshi kezeńi 1:0 esebimen japondyqtardyń paıdasyna sheshildi. Japonııa quramasy ekinshi kezeńde taǵy bir shaıba soqty, sóıtip qarsylastar úshinshi kezeńge 2:0 esebimen tarqady. Úshinshi kezeńde qazaqstandyq hokkeıshiler shıraq oınap, japondyqtardyń qaqpasyna eki shaıba soǵyp, esepti teńestirdi. Shaıbanyń avtorlary - Larısa Svırıdova jáne Zarına Toqtıeva. Oıynnyń negizgi ýaqyty teń aıaqtalǵandyqtan, jarys erejesine sáıkes jeńimpazdy anyqtaý úshin qosymsha 5 mınýt ýaqyt berildi. Qosymsha ýaqytta esep ózgermedi. Sóıtip oıyn taǵdyry býllıt kezinde sheshildi. Japondyqtar Qazaqstan quramasynyń qaqpasyna birde-bir soqqysyn daryta almady. Al Zarına Toqtıevanyń býllıtten soqqan shaıbasy bizdiń komandaǵa jeńis ákeldi.
Aıta keteıik Aq Azıadada hokkeıden áıelder komandalary arasyndaǵy jarysta Qazaqstan, Japonııa, Qytaı, Ońtústik, Koreıa, Soltústik Koreıa quramalary synǵa túsýde. Bizdiń komanda osyǵan deıin úsh oıyn ótkizip, sonyń barlyǵynda jeńiske jetti. Endi jerlesterimiz 3 aqpanda Qytaı quramasymen kezdesedi. Bul oıynda jeńike jetip jatsa, bizdiń komanda Azııa oıyndarynyń jeńimpazy atanady.
