Azıada estafetasynyń alaýyn Astana kóshelerimen A.Vınokýrov, Ankara meri Gokchek, mınıstrler kabınetiniń músheleri, depýtattar, elshiler men jýrnalıster alyp júredi
ASTANA. 28 qańtar. QazAqparat /Gúlnár Jandaǵulova/ - Ataqty veloshabandoz Aleksandr Vınokýrov, Ankara meri Melıh Gokchek, Úkimet basshysynyń birinshi orynbasary Ómirzaq Shókeev, Týrızm jáne sport mınıstri Temirhan Dosmuhambetov, elorda ákimi Imanǵalı Tasmaǵabetov Astana kóshelerimen Azıada alaýyn alyp júredi.
Olardan basqa bul qurmetke depýtattar, elshiler, sportshylar, ártister, medıkter, órt sóndirýshiler men jýrnalıster ıe boldy.
«Alaý estafetasynyń Astana kezeńine qatysatyn alaýgerlerdiń sany 100 adam, olardyń 93-i - elimizge tanymal adamdar», - delingen ákimniń baspasóz qyzmetiniń habarlamasynda.
Alaý 29 qańtar kúni saǵat 17.00-de Astanadaǵy Beıbitshilik jáne kelisim saraıyna jetkiziledi. Al kelesi kúni, 30 qańtarda Estafeta saǵat 12.00-de «Qazaq eli» kesheninen bastalyp, Azııalyq oıyndardyń ashylý saltanaty kezinde - «Astana-Arena» stadıonynda márege jetedi.
«Astana estafetasynyń baǵyty eki kezeńge bólinip otyr. Alaýgerler júrip ótetin jol - 15,4 shaqyrymdy quraıdy. Estafetanyń jalpy ýaqyty 3 saǵatqa sozylady. Astana estafetasyna barlyǵy 100 alaýger qatysady», - delingen habarlamada.
