Azıada elimizdegi sporttyq jýrnalıstıkany jańa deńgeıge kóteredi - professor Sáýle Barlybaeva
ALMATY. 18 qańtar. QazAqparat /Aıgúl Turysbekova/ - Azıada úlken sporttyq doda ǵana emes, sonymen birge elimizdiń barlyq sport jýrnalısteri úshin, onyń ishinde redaktorlar,
teleoperatorlar, rejısserlar úshin úlken synaq. Qazaqtyń ál-Farabı atyndaǵy ulttyq ýnıversıtetiniń tele jáne radıojýrnalıstıka kafedrasynyń professory, ýnıversıtettiń teleradıokesheniniń jetekshisi Sáýle Barlybaeva QazAqparat tilshisine bergen suhbatynda osylaı dedi.
S.Barlybaeva - kórkem gımnastıka boıynsha halyqaralyq sanattaǵy sport sheberi. Úlken sportty aıaqtaǵannan jáne jýrnalıstıka fakýltetin támamdaǵannan keıin Qazaq teledıdarynda jýrnalıst, áskerı-sport redaktsııasynda kommentator bolyp jumys istegen.
Professordyń aıtýynsha, bizdiń elimizde mundaı úlken jáne jaýapty jarys alǵash ret ótkeli otyr, sondyqtan da bul sharanyń Qazaqstannyń halyqaralyq arenadaǵy bedelin kótere túsetini anyq. Azıada - Olımpıada jolyndaǵy birinshi qadam. Oǵan qosa, bul - otandyq sport jýrnalısterimizdiń deńgeıi men sheberlikterin synaıtyn zor múmkindik, úlken synaq.
«Árıne, jankúıerlerdiń basym bóligi jarystardy kógildir ekrannan tamashalaıtyn bolady, sondyqtan da bizdiń operatorlarymyz ben rejısserlerimizdi úlken syn kútip tur. Jarystar tikeleı efırden kórsetilgen kezde, jumystyń kóbisi operatorlar men kommentatorlarǵa baılanysty. Kameralardyń qoıylýy, jaryqtyń túsirilýi, dybystyń qoıylýy, bári-bári mańyzdy. Telekórermender jarystardy operatorlar men rejısserlerdiń kózderimen kóretin bolady, sondyqtan da olardan sporttyq reportajdardy júrgizýdiń joǵary mádenıeti talap etiledi»,- dep sanaıdy S.Barlybaeva hanym.
Onyń pikirinshe, Azıada qazaqstandyq telearnalar úshin jaqsy mektep bolady jáne ulttyq sport jýrnalıstıkasynyń deńgeıin kóteredi.
