Azıada el ımıdjin ilgeriletýge, sportty damytýdyń keleshegi men óskeleń urpaqtyń bolashaǵyna baǵa jetpes úles qosty - T. Dosmuhambetov

Bul týraly búgin QR Parlamenti Májilisinde ótken Úkimet saǵatynda Týrızm jáne sport mınıstri Temirhan Dosmuhambetov málim etti.

«Azııa Olımpıadalyq keńesi Bas assambleıasynyń sheshimimen Qazaqstan Azııa oıyndaryn ótkizý quqyǵy senip tapsyrylǵan Azııadaǵy tórtinshi el atanǵany belgili. Jáne osynyń arqasynda biz álemdik qaýymdastyqqa qysqy sport túrlerindegi óz jetistikterimizdi kórsetýdiń keremet múmkindikterin júzege asyrdyq. El Prezıdentiniń únemi nazarda ustaýynyń arqasynda Azıada oıyndary joǵary deńgeıde uıymdastyryldy. Dúbirli dodaǵa daıyndyq barysyndaǵy 5 jyl ishinde 7 birdeı jańa nysan qurylysy salyndy. 4 sport ǵımaratyna álemdik deńgeıdegi qaıta jańartý júrgizildi. Atalǵan sporttyq ǵımarattar jaqyn arada iri halyqaralyq jarystardy, álem kýboktarynyń kezeńderin ótkizý jáne Azııa sportshylaryn Sochı qalasyndaǵy Olımpıada oıyndaryna daıyndaý ornyna aınalatyn bolady. Jalpy alǵanda Azıadanyń ótýi Qazaqstan sportynyń sharyqtaý shegine aınalyp, Ult kóshbasshysynyń basshylyǵyndaǵy memleketimizdiń turaqty ekonomıkalyq damýynyń kýási boldy. Azıada Qazaqstan halqynyń yntymaǵy men dostyǵyn nyǵaıtty, barlyq qazaqstandyqtardyń eldiń basty sporttyq oqıǵasyna oraı rýhyn biriktirdi», - dedi T. Dosmuhambetov.

Onyń aıtýynsha, Azıada nysandarynyń daıyndalýyna jáne oıynnyń uıymdastyrylýyna Halyqaralyq olımpıada komıtetiniń prezıdenti Jak Roge men Azııa Olımpıadalyq Keńesiniń prezıdenti Sheıh Ahmad Ál Fahad Ál Sabah joǵary baǵa bergen. «Qurlyqtyń eń tańdaýly ári kil myqty sportshylarymen qıyn da ymyrasyz básekege túsip, jalpy komandalyq birinshi oryndy alǵan jáne 32 altyn, 21 kúmis, 17 qola medal ıelenip, Azııa rekordyn jańartqan sportshylarǵa shyn rızashylyǵymdy taǵy da bildirgim keledi», - dedi mınıstr.