Azıada: Dzıýdodan Eldos Smetov, Otgontsetseg Galbadrah baq synaıdy
ASTANA. QazAqparat - Dzıýdodan Azııa oıyndaryna qatysatyn Qazaqstan ulttyq quramasy jasaqtaldy, dep habarlaıdy QazAqparat Qazaqstannyń dzıýdo federatsııasyna silteme jasap.
18 tamyz ben 2 qyrkúıek kúnderi Indonezııada Azııa oıyndary ótedi. XVIII jazǵy Azııa oıyndarynda 42 sport túrinen 476 medal sarapqa salynady. Al dzıýdo boıynsha saıystar 29 tamyz ben 1 qyrkúıek kúnderine belgilengen. Dzıýdodan Qazaqstan ulttyq qurama komandasy jyldyń basty dodasyna qatysý úshin 25 tamyzda Indonezııaǵa attanady.
«Qazirgi tańda Aqmola oblysy, Şýchınsk qalasynda ornalasqan «Jaqsy» sport bazasynda Azııa oıyndary aldyndaǵy oqý-jattyǵý jıynynyń ekinshi kezeńin ótkizip jatyr. Jattyǵý jıynynda Azııa oıyndaryna qatysatyn barlyq dzıýdoshylar bar. Biz olardy 2018 jyldyń basynan bastap ótken Gran Prı, Grand Slam syndy iri jarystardaǵy kórsetkishterine qaraı iriktep aldyq. Ulttyq quramadaǵy sportshylardyń tyńǵylyqty daıyndyqtaryna qarap, Azııa oıyndarynda 1 altyn, 1 kúmis, 1 qola júldeni josparlap otyrmyz», - deıdi dzıýdodan Qazaqstan erler ulttyq qurama komandasynyń bas bapkeri Aıdyn Smaǵulov.
Azıadada baq synaıtyndar qatarynda Qazaqstan ulttyq qurama komandasyna erlerden Eldos Smetov (-60 kg), Eldos Jumaqanov (-66 kg), Jansaı Smaǵulov (-73 kg), Dıdar Hamza (-81 kg), Islam Bozbaev (-90 kg), Vıktor Demıanenko (-100 kg), Sanjar Jabborov (+100 kg), Erasyl Qajybaev (mix), áıelderden Otgontsetseg Galbadrah (-48 kg), Kámshat Qarasaıqyzy(-52 kg), Sevara Nıshanbaeva (-57 kg), Iolanta Berdıbekova (-63 kg), Zere Bektasqyzy (-70 kg), Zarına Raıfova (-78 kg), Gúljan Isanova (+78 kg) alyndy.
