AZIADA: Dopty hokkeıden Qazaqstan quramasy Mońǵolııany 17:0 esebimen oısyrata utty
ALMATY. 4 aqpan. QazAqparat - /Erbol Azanbek/ - Dopty hokkeıden Qazaqstan ulttyq quramasy Mońǵolııany 17:0 esebimen oısyrata utty. Bul bizdiń komandanyń 7-Qysqy Azııa oıyndary aıasyndaǵy ekinshi jeńisi.
Jerlesterimiz keshe "Medeý" muz aıdynynda ótken birinshi oıynynda Qyrǵyzstandy 21:0 esebimen tas-talqyn qylyp jeńgen bolatyn. Endi mine olarǵa mońǵolııalyq bendıshiler de esh qaýqar kórsete almady. Jerlesterimiz qarsylastarynyń qaqpasyna birinshi kezeńde 9, ekinshi kezeńde 8 dop soqty. Bizdiń komandanyń oıynshysy Raýan Esalıevtiń bir ózi osy oıynda 10 goldy qaqpaǵa toǵytty.
2 aqpan kúni bolǵan kezdesýde Mońǵolııa quramasy Qyrǵyzstan bendıshilerinen 17:2 esebimen basym túsken bolatyn.
Aıta keteıik, Qazaqstan 7-Qysqy Azııa oıyndaryn ótkizetin el retinde dopty hokkeı sportyn Azıadanyń baǵdarlamasyna engizgen bolatyn. Jarysqa úsh komanda - Qazaqstan, Mońǵolııa, Qyrǵyzstan qatysýda. Jarys erejesine sáıkes, eki oıyn qorytyndysy boıynsha úzdik shyqqan Qazaqstan men
Mońǵolııa 6 aqpanda altyn júlde úshin oınaıtyn bolady. Al Qazaqstannan da, Mońǵolııadan da oısyraı utylǵan Qyrǵyzstan quramasy dopty hokkeıden Azıadanyń qola júldegeri atanady.
QR Dopty hokkeı federatsııasynyń Bas hatshysy Vladımır Savchenkonyń aıtýynsha, dopty hokkeı Halyqaralyq Olımpıada oıyndary komıtetiniń lıtsenzııasyn alǵanymen, Qysqy Olımpıada oınydarynyń baǵdarlamasyna áli engen joq. Al onyń Azıadanyń baǵdarlamasyna engizilgeni 2014 jyly Sochıde ótetin qysqy Olımpıada oıyndarynyń baǵdarlamasyna engizilýine jasalǵan alǵashqy qadam bolyp tabylady.
