Azıada: Dopty hokkeıden Qazaqstan quramasy Qyrǵyzstannan 21:0 esebimen basym tústi
ALMATY. 3 aqpan. QazAqparat. /Erbol Azanbek/- 7-qysqy Azııa oıyndary aıasynda, búgin Almatydaǵy "Medeý" muz aıdynynda dopty hokkeıden Qazaqstan men Qyrǵyzstan quramalarynyń arasyndaǵy kezdesý ótti. Matchta 21 :0 esebimen jerlesterimiz iri jeńiske qol jetkizdi.
Aıta keterligi, bul oıyn tuman men qardyń saldarynan asa qolaısyz jaǵdaıda ótkizildi. Oıyn bastalar aldynda kezdesýdi keıinge shegerý máselesi de talqylanǵan bolatyn. Alaıda oıyndarǵa tórelik aıtýshy Halyqaralyq bendı federatsııasynyń (FIB) tehnıkalyq delegaty Valerıı Mozgov qar men tumanǵa qaramastan kezdesýdi ýaqytynda bastaý týraly sheshim shyǵardy. Ol sondaı-aq mamandarǵa qolaıly bolýy úshin matchty 30 mınýttan 3 kezeńge bólip ótkizý jóninde sheshim qabyldady.
Aýa-raıynyń qolaısyzdyǵyna qaramastan kezdesý sátti ótti. Qazaqstandyq Raýan Isalıev oıynnyń birinshi mınýtynda-aq qarsylastar qaqpasyna dop soqty. matchqa keletin bolsaq, birinshi kezeń 9:0, ekinshi kezeń 10:0, úshinshi kezeń 2:0 esebimen jerlesterimizdiń paıdasyna sheshildi. Oıyndar erteń de jalǵasady. Onda Qazaqstan quramasy Mońǵolııa bendıshilerimen kezdesedi. Esterińizge sala keteıik, keshe Mońǵol quramasy Qyrǵyzstan bendıshilerin 17:2 esebimen oısyrata utqan bolatyn.
