«Azıada arýy» baıqaýynyń fınalyna 20 arý ótti
ALMATY. 29 qańtar. QazAqparat /Názıra Eleýhan/ - Aq Azıadanyń elimizde ótýi- halyqaralyq qoǵamdastyqtyń úlken senimi. Biz bárimiz Qazaqstan ómirindegi biregeı oqıǵanyń kýágerleri bolyp tabylamyz.
Sharany uıymdastyryp otyrǵan bizder úshin bul oqıǵa úlken maqtanysh, dedi keshe Almatyda ótken arnaıy baspasóz máslıhatynda «Azıada arýy» baıqaýynyń Bas dırektory Konstantın Korotkov.
Qala ákimdiginiń mádenıet bóliminiń basshysy Raýshan Qasymovanyń aıtýynsha, aıtýly oqıǵanyń kórkin «Mádenı Azıada» jobasy asha túspek. «Joba aıasynda qazaqtyń mádenıeti men dástúrinen syr shertetin kóptegen sharalar ótetin bolady. Almatynyń eń úzdik sahnalarynda ár túrli kontsertter bolady. Jabylý saltanatyna arnalǵan gala-kontsertte elimizdiń óner juldyzdarymen qatar, sheteldegi otandas óner sheberleri qatysady»,-dedi ol.
Baıqaýǵa «Chopard» kompanııasy qoldaý kórsetedi. Atalmysh kompanııanyń ókili Svetlana Rımmer: «Men demeýshilik jasaǵan kompanııanyń Shveıtsarııadaǵy shtab-páterine barý kezinde elimiz úshin úlken maqtanysh sezimde boldym, kompanııa basshylary aıtýly oqıǵanyń demeýshisi bolǵandyǵyn maqtan tutty. Men óz atymnan jáne Eýropadaǵy eń úlken kompanııa basshylarynyń atynan aýqymdy sport merekesine qatysýǵa múmkindik bergenderine, sonymen qatar qoldaýymyzben úles qosatyndyǵymyzǵa, bul brendke senim artqandaryna alǵysymyzdy bildirgimiz keledi»,-dedi.
Baspasóz máslıhatynda «Azıada arýy» baıqaýynyń tájin qazaqstandyq dızaıner Aıgúl Qasymova jasaǵandyǵy aıtyldy. Baıqaýdyń bas dızaıneri Aleksandr Chjen qatysýshy qyzdar ejelgi túrik pen búgingi zaman qyzdarynyń beınesinde bolatyndyǵyn atap ótti. Onyń aıtýynsha, baıqaý úsh defıleden turady. «Qyzdar sporttyq kıimder men keshki kóılekter, ár túrli jaǵaly tondar kıip shyǵatyn bolady»,-dedi Aleksandr Chjen.
Baıqaýdyń Bas dırektory Konstantın Korotkovtyń aıtýynsha, baıqaýǵa 150-den asa qyzdar ótinish bildirgen. «Іriktelgen 60 qyzdyń 20-sy fınalǵa ótti. Olar endi aqtyq synda baqtaryn synaıtyn bolady. Qazir olar kásibı mamandardyń dáristerin alýda. Aıta ketetinim, qyzdardyń barlyǵy sportqa qatysy bar boıjetkender», -dedi ol. Onyń aıtýynsha, ádil qazylar alqasynyń quramynda olımpıada chempıony Olga Shıshıgına, Ilıa Ilın, ánshiler Nurlan Abdýllın, Parvız Nazarov, sonymen qatar, elimizdiń basqa da mádenıet qaıratkerleri bar.
